Prevention-ը հայտնում է, որ կինը հանգստյան օրերին որոշել է տոնական սեղանի համար կոկտեյլ պատրաստել: «Մարգարիտայի» բաղադրության մեջ է մտնում լայմի թարմ հյութը, եւ Քորթնին անձամբ է զբաղվել այս հարցով: Նրա խոսքով՝ ճզմել է «հարյուրավոր լայմեր», որից հետո օրվա մնացյալ մասն անցկացրել է լողավազանում արեւի տակ հանգստանալով:
Կնոջ ձեռքերը հաջորդ առավոտյան ծածկվել են ահռելի կարմիր բշտիկերով: Նրան ախտորոշել են ֆիտոֆոտոդերմատիտ՝ մաշկային բորբոքային պրոցես, որը պայմանավորված է արեւի լույսի հանդեպ մաշկի մեծ զգայունությամբ: Դրա պատճառը բույսերի հյութն է, որոնք պարունակում են լույսի հանդեպ մաշկի զգայունությունը մեծացնող միացություններ (ֆուրոկումարիններ): Ճառագայթահարումից հետո, որպես կանոն, 24 ժամ անց մաշկի վրա ցան է առաջանում, որն իր բարձրակետին է հասնում 48-72 ժամ հետո:
Ֆուրոկումարիններ են պարունակվում մասնավորապես լայմի, կիտրոնի, նարինջի, գազարի, նեխուրի եւ թզի մեջ: Ֆիտոֆոտոդերմատիտով հիվանդացության բարձրակետը ամռանն է, ընդ որում՝ այս հիվանդությունը դժվար է ախտորոշվում՝ դերմատիտին կամ սնկային ինֆեկցիային նմանության պատճառով:
Ցանի վերացումից հետո մի քանի շաբաթ, նույնիսկ ամիսներ շարունակ մաշկին կարող են մնալ մուգ բծեր: Վտանգից խուսափելու համար փորձագետները խորհուրդ են տալիս ցիտրուսայինների հյութը ճզմել ձեռնոցներով կամ հետո ձեռքերը մանրակրկիտ լվանալ: