Ուգանդայում Էբոլայի դեմ պատվաստում են անցկացնում

12:11   18 հունիսի, 2019

Ուգանդայում պատվաստում են անցկացնում Էբոլա տենդի դեմ, որը երկիր է թափանցել Կոնգոյից, որտեղ գրանցվել է այս հիվանդության լուրջ բռնկում:

Anadolu Ajansi-ն հայտնում է, որ պատվաստումն անցկացնում են Կոնգոյի, Կագանդոյի, Բվերայի եւ Մպոնդվեի սահմանին:

Առողջապահության համաշխարհային կազմակերպության տվյալներով՝ Ուգանդայում գրանցվել է Էբոլայի 96 դեպք: Գրանցվել է նաեւ մահվան 2 դեպք՝ հունիսի 11-ին եւ 12-ին մահացել էին 5-ամա տղա եւ նրա տատիկը, որոնք վարակվել էին Կոնգո ուղեւորության ժամանակ:

Հիշեցնենք, որ Կոնգոյում Էբոլա տենդի բռնկումը սկսվել է 2018 թվականի օգոստոսին. չնայած կանխարգելիչ բոլոր միջոցառումներին, վարակվել է ավելի քան 2 հազար մարդ, որից 1200-ը մահացել է:

Չի նշվում, թե պատվաստման համար կոնկրետ ինչ պատվաստանյութ է օգտագործվում: NEWS.am Medicine-ի տեղեկություններով՝ առայժմ գոյություն չունի պատվաստանյութ, որը Էբոլա վիրուսի դեմ ապացուցված արդյունավետություն կունենար եւ օգտագործման համար հավանության արժանացած կլիներ, սակայն կան մի քանի խոստումնալից պատվաստանյութեր:



© NEWS.am Medicine