Հազվադեպ հիվանդությամբ տառապող աղջկան «նոր գլուխ» էր հարկավոր (ֆոտո)

Ավա Քառլինը ծնվել է հազվադեպ հիվանդությամբ՝ կրանիոսինոստոզով։ Դա գանգակարերի վաղ փակումն է, ինչը նպաստում է գանգի դեֆորմացմանն ու ներգանգային հիպերտենզիային։

Ինչպես տեղեկացնում է The Daily Mail-ը, Ավան լույս աշխարհ է եկել ճզմված գանգով։ Ծնողները տագնապ են հնչեցրել, բայց բժիշկներն ասել են, որ այդ դեֆեկտը կանցնի ինքն իրեն ժամանակի ընթացքում։ Սակայն հակառակ կանխատեսումներին, առաջին վեց շաբաթներին փոքրիկը գրեթե չի կարողացել շարժվել։ Միայն ծնողների համառությունն է ստիպել բժիշկներին ավելի մանրակրկիտ բուժզննում իրականացնել եւ ճիշտ ախտորոշում անել։

Բժիշկները ծնողներին նախազգուշացրել են, որ կրանիոսինոստոզը կարող է բացասաբար ազդել ուղեղի զարգացման վրա։ 18 ամսական հասակում աղջկան գանգի վերականգնման ինը ժամ տեւած վիրահատության են ենթարկել՝ ճակատից մինչեւ ծոծրակ շտկելով։ Դրա համար վիրաբույժները ստիպված էին կոտրել Ավայի գանգը եւ դրանից «նոր գլուխ» հավաքել։ Այնուհետեւ գանգի հատվածները ամրացվել են հատուկ թաղանթների ու պտուտակների օգնությամբ։

Լիակատար վերականգնման համար աղջկան երկու տարի էր պետք։ Հիմա Ավան սովորական, առողջ երեխայի տեսք ունի, եւ ոչինչ, բացի գանգի սպիից, չի մատնում այն, թե ինչի միջով է անցել նա։ Բոլոր փորձություններից հետո նրա ծնողները՝ Ջենան եւ Մեթյուն, որոնք դաստիարակում են նաեւ յոթնամյա որդուն, պաշտոնապես ամուսնացել են։