Կալցիումով եւ D վիտամինով ԲԱՀ-երը կարող են վտանգավոր լինել. հետազոտություն
21:32 11 հուլիսի, 2019ԲԱՀ-երը, որոնցում պարունակվում են կալցիում եւ վիտամին D, կարող են վտանգավոր լինել, նախազգուշացնում են Արեւմտյան Վիրգինիայի գիտնականները։ Թեեւ D վիտամինն անհրաժեշտ է կալցիումի յուրացման համար, այդ նյութերի համակցումը ԲԱՀ-երում բարձրացնում է կաթվածի առաջացման ռիսկը։
Համաձայն ավելի քան 500 հազար մարդու մասնակցությամբ իրականացված հետազոտության՝ կալցիում-վիտամին D համակցությունը 17 տոկոսով բարձրացնում է կաթվածի ռիսկը։
Ինչպես հայտնի է, վիտամին D-ն եւ կալցիումն անհրաժեշտ են ոսկրերի առողջության համար։ Բայց գիտնականները խորհուրդ են տալիս դրանց մակարդակն օրգանիզմում պահել ճիշտ սնվելու օգնությամբ։ Իսկ ԲԱՀ-երը, մասնագետների խոսքով, անվտանգ չեն, չէ՞ որ դրանք նպաստում են աթերոսկլերոտիկ կոշտացումների առաջացմանն անոթներում։
Գիտնականները խորհուրդ են տալիս ԲԱՀ-եր օգտագործել միայն նյութերից մեկի ապացուցված սուր դեֆիցիտի դեպքում եւ բժշկի նշանակմամբ։ Իսկ ԲԱՀ-եր խմել կանխարգելիչ նպատակներով մասնագետները խորհուրդ չեն տալիս։