Ինչպե՞ս 20 տարվա ստաժ ունեցող ծխողները կարող են պաշտպանվել սրտի հիվանդություններից
23:41 22 օգոստոսի, 2019Ծխելուց հրաժարվելը օգտակար է ցանկացած տարքիում եւ «ստաժի» դեպքում: Վանդերբիլտի համալսարաններից մասնագետների հետազոտությունը ցույց է տվել, որ անգամ 20 տարվա ստաժով մոլի ծխողները կարող են 5 տարում զգալիորեն նվազեցնել սրտանոթային հիվանդությունների վտանգը, եթե թողնեն ծխելը:
MedicalXpress-ը հաղորդում է, որ գիտնականները վերլուծել են 1954-2014 թվականների ստացված 8770 մարդու տվյալները, որպեսզի հասկանան, թե ինչպես է սրտանոսթային համակարգի վրա ազդում ծխելուց լիովին կամ մասնակի հրաժարվելը: Հաշվի է առնվել սրտամկանի ինֆարկտի, սրտային անբավարարության եւ սրտանոթային համակարգի ֆունկցիոնալության խախտումից մահացության ռիսկը:
Պարզվել է, որ նախկին ծխողների օրգանիզմը համեմատաբար ավելի արագ է վերականգնվում անգամ նրանց մոտ, ովքեր մի քանի տասնամյակ են ծխել, իսկ հետո թողել:
Ծխելուց հրաժարվելուց հետո առաջին 5 տարիների ընթացքում սրտի եւ անոթների խախտման հավանականությունը նվազում է 39 տոկոսով: Բայց որպեսզի հիվանդությունների վտանգը նվազի մինչեւ երբեք չծխած մարդկանց մակարդակին, 10-25 տարի է պահանջվում:
Գիտնականները հիշեցնում են, որ ծխելը համարվում է կաթվածների եւ արյունատար համակարգի այլ հիվանդություններից մահերի 20 տոկոսի պատճառը:
Իսկ ծխելը թողնելը միշտ օգտակար է առողջության համար եւ երբեք ուշ չէ: