Ընկճախտը գենետիկ կապ ունի 22 այլ հիվանդությունների հետ. հետազոտություն
17:12 7 սեպտեմբերի, 2019Գենետիկ բնույթ ունեցող ընկճախտը կապ ունի 22 այլ հիվանդությունների հետ՝ պարզել են Հարավային Ավստրալիայի համալսարանի գիտնականները: Այդ հիվանդությունների թվում են՝ սրտի իշեմիկ հիվանդություն, ասթմա, էզոֆագիտ, ստամոքսաաղիքաբորբ եւ միզամուղ համակարգի խանգարումներ:
Գիտնականները վերլուծել են մոտ 337 000 մարդու տվյալներ՝ ցանկանալով հասկանալ՝ կա արդյոք կապ ընկճախտի եւ 925 հիվանդությունների միջեւ: Պարզվել է, որ 22 հիվանդություն իսկապես կապ ունի ընկճախտի հետ:
Գիտնականները նշում են, որ աղեստամոքսային տրակտի հետ կապված խնդիրների որոշ դեպքերում բարդությունները պայմանավորված են ընկճախտի բուժման համար դեղամիջոցների կողմնակի ազդեցությամբ:
Առողջական խնդիրներից խուսափելու համար գիտնականները խորհուրդ են տալիս ուշադրություն դարձնել սննդակարգին եւ կենսակերպին, ինչը կօգնի պայքարել ընկճախտի եւ դրա հետ կապված սոմատիկ հիվանդությունների դեմ:
Գիտնականները նաեւ նշում են, որ ընկճախտով տառապող պացիենտները զուգահեռաբար այլ հետազոտություններ պետք է անցնեն՝ պարզելու համար՝ արդյոք այլ հիվանդություններ ունեն: