Ֆիթնեսն օգնում է պահպանել ուղեղի կառույցները եւ լավացնել հիշողությունը

Ֆիթնեսն օգնում է պահպանել ուղեղի կառույցները, բարելավել հիշողությունը եւ արագ կողմնորոշվելու կարողությունը։ Այսպիսի տվյալներ ստացվել են 20-59 տարեկան 1200 փորձարկվողների գլխուղեղի ֆիզիկական ձեւերի եւ առողջության վերլուծության շնորհիվ, տեղեկացնում է «Վեստի.Մեդիցինա»-ն։

Բոլոր մասնակիցներն ուղեղի սքանավորում են անցել, ինչպես նաեւ հիշողության, դատողությունների եւ մտքերի տրամաբանական լինելու թեստեր, դրան զուգահեռ՝ մասնագետները գնահատել են փորձարկվողների սիրտ-անոթային համակարգի վիճակը վազքուղյակում։

Մասնակիցները, որոնք քայլքի երկու րոպեանոց թեստի ընթացքում լավագույն աերոբիկ տոկունություն են ցուցաբերել, ավելի հաջող են կատարել դատողության թեստերը, քան սրտի բեռնվածությանը նրանց պակաս հարմարեցված հասակակիցները։

Նույն տղամարդկանց եւ կանանց մոտ հայտնաբերվել են ավելի առողջ նյարդային հյուսվածքներ ուղեղի սպիտակ նյութում։ Հետազոտողները նշել են, որ սպիտակ նյութը վճռական նշանակություն ունի որակյալ նեյրոնային հաղորդակցման համար։

Այս արդյունքները հաստատվել են այնպիսի գործոնների հաշվառումից հետո, ինչպիսին են տարիքը, սեռը, արյան ճնշումը, մարմնի զանգվածի ինդեքսը եւ դիաբետի առկայությունը։