Աշխատանքի վայրում ֆիզիկական ծանրաբեռնվածությունը կարող է վնասել սիրտը՝ ի տարբերություն սպորտի

Աշխատանքի վայրում ֆիզիկական ծանրաբեռնվածությունը կարող է վնասել սիրտը՝ պարզել են ֆրանսիացի եւ ավստրալացի գիտնականները: Հետազոտության համաձայն, որի արդյունքները հրապարակվել են Hypertension ամսագրում, ֆիզկուլտուրան օգտակար է սրտի համար, սակայն չափից շատ ֆիզիկական ծանրաբեռնվածությունը լավացնում է անոթների եւ սրտի վիճակը:

Հետազոտության հեղինակներն ուսումնասիրել են 50-75 տարեկան ավելի քան 10 000 կամավորների առողջական վիճակի մասին տվյալները: Նրանք ցանկացել են պարզել՝ արդյոք սրտի վրա միանման են ազդում ֆիզիկական ակտիվության տարբեր տեսակները:

Մասնակիցները լրացրել են հարցաթերթիկները ֆիզիկական ծանրաբեռնվածության ինտենսիվության, տեւողության, հաճախականության մասին 3 տարբեր իրավիճակներում՝ ֆիզիկական ակտիվություն սպորտում, աշխատանքի վայրում եւ ազատ ժամանակ:

Ապա մասնակիցների սրտանոթային առողջությունը գնահատվել է զարկերակային վիճակի հիման վրա՝ քներակի ուլտրաձայնային վիզուալացման օգնությամբ: Այդ միջոցի օգնությամբ հետազոտողները չափել են բարոռեֆլեքսային զգայունությունը:

Բարոռեֆլեքսն օրգանիզմի ինքնակարգավորման մեխանիզմ է, որն օգնում է պահպանել զարկերակային ճնշման մակարդակը: Այդ մեխանիզմում խախտումները հանգեցնում են առողջական լուրջ խնդիրների եւ սրտի կանգի ռիսկի մեծացման:

Ստացված տվյալների համաձայն՝ սպորտային ֆիզիկական ակտիվությունը դրական է ազդում մարդկանց վիճակի վրա, այն դեպքում, երբ ծանրություն կրելու տեսքով ֆիզիկական ակտիվությունը վնաս է հասցնում սրտանոթային համակարգին:

«Մեր հետազոտության արդյունքները ցույց չեն տալիս, թե աշխատանքի վայրում ֆիզիկական ակտիվությունը վնաս է առողջությանը: Հակառակը, հաստատվում է, որ վնասակար է մշտական, լարված գործունեությունը, օրինակ, աշխատանքի վայրում ծանր բեռներ բարձրացնելը»,- նշել է Ժան-Ֆիլիպ Էմպանան: