7-ամյա աղջիկը փրկել է մոր կյանքը YouTube-ի տեսանյութերի օգնությամբ
14:30 16 դեկտեմբերի, 20197-ամյա Ջեսիկա Քինդերը անգլիական Փրեսթոն քաղաքից (Լանքաշիրի կոմսություն) փրկել է մոր կյանքը YouTube-ի ուսուցանող տեսանյութի շնորհիվ։
Ինչպես տեղեկացնում է Daily Mail պարբերականը, նոյեմբերի 26-ի առավոտյան աղջիկը տանը սուրբծննդյան «Գրինչ» ֆիլմն էր նայում, երբ նրա 32-ամյա մայրը՝ Բեքի Գրինը, գիտակցությունը կորցրած ընկել է հատակին։ Աղջիկն անմիջապես վերցրել է բաժակն ու ջուր ցփնել մոր դեմքին, ինչից հետո սիրտ-թոքային վերակենդանացում է արել եւ նրա հեռախոսով շտապօգնություն կանչել։
Կինն ուշքի եկավ միայն այն ժամանակ, երբ տուն էին եկել պարաբժիշկները։ Նրան տարան մերձակա հիվանդանոց, որտեղ հետազոտությունը ցույց տվեց, որ նա էպիլեպսիայի նոպա է ունեցել։
«Երբ գիտակցեցի, թե ինչ է տեղի ունեցել, դստերս հարցրի. «Որտեղի՞ց գիտեիր, թե քեզ ինչպես պետք է պահես,- պատմել է կինը: - Նա պատասխանեց, որ նման բան է տեսել YouTube-ի տեսանյութերից մեկում: Բայց ես ենթադրել անգամ չէի կարող, որ նրան հետաքրքրում են սիրտ-թոքային վերակենդանացում կատարելու մասին տեսանյութերը: Եթե նրա օպերատիվ օգնությունը չլիներ, ով գիտե, թե ամենն ինչպես կարող էր ավարտվել»:
Բժիշկների ենթադրությամբ՝ էպիլեպտիկ նոպայի պատճառը միջադեպն էր, որը Գրինի հետ տեղի էր ունեցել 12 տարի առաջ. այդ ժամանակ նա ընկել էր եւ գլուխը վնասել: Սակայն նրա մոտ առաջին անգամ էր տեղի ունենում էպիլեպսիայի նոպա: Նա առաջիկա ամիսներին պետք է անցնի լրացուցիչ հետազոտություններ, որոնք կհայտնաբերեն հիվանդության ստույգ պատճառը:
Դե, իսկ Ջեսիկան հիմա ցանկանում է կյանքը նվիրել բժշկությանը, որ օգնի մարդկանց: