Չինական կորոնավիրուսի զոհերի թիվը հասել է 106-ի
10:38 28 հունվարի, 2020Չինական կորոնավիրուսի զոհերի թիվը հասել է 106-ի, իսկ ընդամենը մեկ օրում վարակման հաստատված դեպքերի թիվը գրեթե կրկնակի աճել է. եթե երեկ ասում էին 2835 դեպքի մասին, ապա այսօր՝ արդեն 4515-ի:
BBC-ն հայտնում է, որ մահացած պացիենտների մեծամասնությունը ուղեկցող հիվանդություններ ունեցող տարեցներ են: Նրանց մեծ մասը Հուբեյ նահանգից է, սակայն վիրուսի հետեւանքով մահվան մեկ դեպք է արդեն գրանցվել նաեւ Չինաստանի մայրաքաղաք Պեկինում:
Չինաստանի մի քանի քաղաքներ, այդ թվում՝ բռնկման էպիկենտրոն Ուհանը կարանտինի մեջ են: Որոշ քաղաքներում առանց դիմակի փողոց դուրս չի կարելի:
Վիուսի տարածումը զսպելու համար զվարճանքի շատ կենտրոններ, որտեղ չինացիները սովորաբար հաճախում էին ամանորյա տոների ժամանակ, այդ թվում՝ Դիսնեյլենդ այգիները փակել են, իսկ արձակուրդները երկարացրել մինչեւ այս շաբաթվա վերջը: Առայժմ հայտնի չէ, թե դպրոցներում եւ համալսարաններում դասերը երբ կվերականգնեն:
Չնայած բոլոր միջոցառումներին, հիվանդության ավելի ու ավելի շատ դեպքեր են գրանցվում նաեւ Չինաստանի մյուս քաղաքներում եւ աշխարհի մյուս երկրներում: