Ամերիկյան ռեստորաններում գրեթե բոլոր կերակուրները վնասակար են առողջության համար

Ամերիկյան ռեստորաններում գրեթե բոլոր կերակուրները վնասակար են առողջության համար։ Այս մասին ասվում է նոր հետազոտությունում, որը հրապարակվել է Journal of Nutrition-ում։

ԱՄՆ-ում ճարպակալում ունեցող մարդկանց թիվն աճում է մեծ արագությամբ, եւ շատ մասնագետներ դրա մեջ մեղադրում են անառողջ սնունդը եւ քիչ շարժուն կենսակերպը։ Արեւմտյան սննդակարգը, մասնագետների խոսքով, պարունակում է մեծ քանակությամբ ածխաջրեր եւ ճարպ։ Միջին վիճակագրական ամերիկացու սննդաբաժնում շատ են հացամթերքները, կարմիր միսը, տապակած կարտոֆիլը եւ խյուսը։

Նոր հետազոտությունը ցույց է տվել, որ Ամերիկայում բոլոր ռեստորանների կերակուրների մոտ 0,1 տոկոսը կարելի է համարել օգտակար առողջության համար։ Թաֆթսի համալսարանի գիտնականները Մասաչուսեթսում ուսումնասիրել են ավելի քան 35 000 մարդու սննդային նախասիրությունները, որոնք մշտապես այցելել են ռեստորաններ 2003-2016 թվականներին։ Բոլոր կերակուրների կեսը պարունակել է անբավարար քանակությամբ օգտակար սննդարար նյութեր, իսկ իդեալական չի եղել եւ ոչ մի կերակուր։

Հետազոտության հեղինակների կարծիքով՝ դա մտահոգվելու առիթ է տալիս, քանի որ ռեստորաններում եւ սրճարաններում է սնվում ամերիկացիների 20 տոկոսը, իսկ ֆասթ ֆուդ մշտապես օգտագործում է 12 տոկոսը։

Գիտնականների խոսքով՝ ամերիկացիներին անհնար է հետ պահել սրճարաններ եւ ռեստորաններ այցելելուց։ Շատ ավելի հեշտ է ստիպել այդ հաստատությունների տերերին իրենց կերակուրներն ավելի օգտակար դարձնել առողջության համար, անգամ եթե նրանք համի տեսակետից այնքան էլ «սովորական» չթվան։