ՍՇՎ-ի սեզոնի պատճառով դիմելիությունն ավելացել է. Կապանի բուժկենտրոնի մանկական բաժանմունքում հավելյալ մահճակալներ են տեղադրել

Կապանի բուժկենտրոնի մանկական բաժանմունքում հավելյալ մահճակալներ են տեղադրել, քանի որ ՍՇՎ-ի սեզոնի պատճառով դիմելիությունն ավելացել է: Ավելին, այստեղ են բերում ոչ միայն կապանցի երեխաներին, այլ նաեւ երեխաների Մեղրիից, Քաջարանից եւ այլ քաղաքներից: Այս մասին NEWS.am Medicine-ի հետ զրույցում ասաց բուժկենտրոնի տնօրեն Կարեն Մելքոնյանը:

Նրա խոսքով՝ իրավիճակն այսօր ձմեռային սեզոնի համար սովորական է, այս ամիսներին երկրում ՍՇՎ-ով պայմանավորված հիվանդացությունն աճում է, եւ այս տարի այն ոչնչով չի տարբերվում նախորդ տարիներից: Բուժկենտրոնի մանկական ստացիոնարը նախատեսված է 10 մահճակալի համար, սակայն տեղադրվել են հավելյալ 5 մահճակալներ, որպեսզի հնարավոր լինի աջակցել հարեւան քաղաքների պացիենտներին: Հավելյալ մահճակաները տեղադրվել են առաջին հարկում, նախկինում այդտեղ եղել է մանկական ինտենսիվ թերապիայի բաժանմունքը:

Տնօրենի խոսքով՝ այժմ բուժկենտրոն են բերում ՍՇՎ-ի պատճառով բարդություններով երեխաների՝ օբստրուկտիվ բրոնխիտով, թարախային օտիտով, թոքաբորբով եւ այլն: Նրանց, ովքեր ստացիոնար բուժման կարիք ունեն, հոսպիտալացնում են, մյուսներին բուժում է առաջարկվում ցերեկային ստացիոնարում, որն էլ հենց կազմակերպել է հավելյալ մահճակալների տեղադրումը: Ցերեկը երեխան մնում է բուժկենտրոնում եւ համապատասխան բուժում ստանում, գիշերը վերադառնում է տուն:

Հիշեցնենք, որ առողջապահության նախարարության տվյալներով՝ Հայաստանում այսօր տարածված են Ա H1N1, Բ տեսակի գրիպները, ինչպես նաեւ ՍՇՎ վիրուսները, այդ թվում՝ ռինովիրուսները, ադենովիրուսները, ռեսպիրատոր-սինցիտիալ վիրուսները եւ այլն: