Ո՞ր դեղամիջոցների օգտագործումն է վտանգավոր կորոնավիրուսի ժամանակ
11:31 16 մարտի, 2020Որոշ հակաբորբոքային դեղամիջոցների (օրինակ՝ իբուպրոֆեն եւ կորտիզոն) օգտագործումը կարող է վտանգավոր լինել կորոնավիրուսի ժամանակ: Այս մասին Twitter-ում գրել է Ֆրանսիայի առողջապահության նախարար Օլիվյե Վերանը:
Նախարարը բարձր ջերմությունն իջեցնելու համար խորհուրդ է տվել դրանց փոխարեն պարացետամոլ օգտագործել:
«Եթե դուք արդեն հակաբորբոքային դեղամիջոցներ եք ընդունել կամ կասկածում եք, խորհրդակցեք բժշկի հետ»,- գրել է նա:
The Lancet-ում հրապարակված նոր հոդվածում ասվում է, որ պացիենտների մոտ, որոնք կորտիկոստերոիդներ են ընդունում, կորոնավիրուսն ավելի ծանր ընթացք է ունենում: Ինչպես ցույց է տվել MERS-ով ծանր հիվանդ պացիենտների հետադարձ հետազոտությունը, ստերոիդներ ստացող մարդկանց գրեթե կեսը թոքերի արհեստական օդափոխման, զարկերակային ճնշման բարձրացման դեղերի եւ դիալիզի կարիք է ունեցել: Դրանից բացի, ստերոիդներ ընդունելուց հետո պացիենտների օրգանիզմը վիրուսից «մաքրվելու» համար ավելի շատ ժամանակի կարիք ունի: