Որքա՞ն երկար կորոնավիրուսը կարող է պահպանվել սառցախցիկում

Եթե COVID-19-ը նման է այլ կորոնավիրուսներին, ապա այն, ամենայն հավանականությամբ, կարող է պահպանվել մինչեւ 2 տարի զրոյից ցածր ջերմաստիճանի պայմաններում: Նման կարծիք է հայտնել Աբու Դաբիում Քլիվլենդի կլինիկայի ինֆեկցիոն հիվանդությունների բաժնի վարիչ, բժիշկ Մոհամադ Մոոտին:

Al Arabiya-ի հաղորդմամբ՝  Մոոտին համոզված է, որ  էքստրեմալ ցածր ջերմաստիճանը չի կարող սպանել նոր կորոնավիրուսը: Մասնագետի խոսքով՝ կորոնավիրուսի նմանատիպ շտամմների հետազոտությունները ցույց են տվել, որ դրանք կարող են պահպանվել մինուս 20 աստիճանի պայմաններում:

Բացի այդ, վերջին հետազոտությունները ցույց են տվել, որ կորոնավիրուսները կարող են պահպանվել մինչեւ 72 ժամ միջինի ջերմաստիճանի պայմաններում:

«Պարբերաբար ձեռքերը լվանալով, մարդիկ կարող են նվազագույնի հասցնել կորոնավիրուսով վարակման ռիսկը»,- ասել է մասնագետը:

Նա նաեւ հիշեցրել է, որ վարակման կանխարգելման համար պետք է հետեւել հիգիենայի կանոններին եւ սոցիալական դիստանցիային: