Ինչպե՞ս պաշտպանել հոգեկանը կորոնավիրուսի պանդեմիայի ժամանակ

Շատերը ներկայում չափազանց ճնշված են կորոնավիրուսի պանդեմիայի եւ աշխարհում դրա առաջացրած խնդիրների հետեւանքով: Ինչպե՞ս կարելի է պաշտպանել սեփական հոգեկանը ստեղծված պայմաններում:

Մի քանի խորհրդով կիսվել է bbc.com-ը:

AnxietyUK բրիտանական ասոցիացիայից Նիքի Լիդբերգը, որն օգնում է տագնապայնության նոպա ունեցող մարդկանց, պնդում է, որ մի շարք հոգեկան շեղումների, այդ թվում՝ տագնապայնության, հիմնական պատճառը իրավիճակի նկատմամբ վերահսկողությունը կորցնելու, իրավիճակը չհաղթահարելու վախն է: Այդ պնդման հետ համակարծիք է նաեւ Mind բարեգործական կազմակերպությունից Ռոուզի Ուիթերլին:

Երկու փորձագետներն էլ համոզված են, որ պանդեմիայի պայմաններում հոգեկան խանգարումներ ունեցող մարդկանց պետք է լրացուցիչ օգնություն, սակայն այդպիսի հիվանդություններ չունեցողները նույնպես չպետք է մոռանան իրենց հոգեկան առողջության մասին:

Ի՞նչ կարելի է անել չափից շատ տագնապայնությունը հաղթահարելու համար:

Նախ մասնագետները խորհուրդ են տալիս ավելի քիչ լուրեր կարդալ (հատկապես, բացասական) եւ մանրակրկիտ ընտրել աղբյուրները: Այսօր համացանցում կան բազմաթիվ ֆեյքային լուրեր, որոնց աղբյուրներին չպետք է հավատալ: Ցանկալի է ստանալ տեղեկատվություն կառավարական կայքերից եւ ճանաչված միջազգային ռեսուրսներից:

Այնուհետեւ, փորձեք հանգստանալ սոցցանցերից: Ձեր լրահոսում արգելափակեք այն էջերից ստացվող տեղեկատվությունը, որոնք մեծաթիվ նեգատիվ նյութեր են պարունակում եւ ստիպում են մտահոգվել: Կարելի է նաեւ անջատել որոշ բանալի բառերով ծանուցումները:

Եւ վերջում, փորձեք ավելի շատ շփվել մարդկանց հետ: Ինքնամեկուսացման պայմաններում կարելի է շփվել, օրինակ, հեռախոսով:

Եթե դուք ինքնամեկուսացվել ենք, փորձեք օրերը լցնել ինչ-որ հետաքրքրությամբ, անել այնպես, որ յուրաքանչյուր օրն ինչ-որ կերպ տարբերվի նախորդից: Կարդացեք լավ գրքեր, արեք գործեր, որոնք ավելի վաղ չէիք հասցնում անել: Նաեւ մի մոտացեք խմել բավականաչափ ջուր եւ զբաղվել սպորտով՝ տանը վարժություններ կատարելու միջոցով: