Աշխարհում կորոնավիրուսի զոհերի թիվը հասել է 74 782-ի. worldometers.info
10:42 7 ապրիլի, 2020Աշխարհում նոր կորոնավիրուսի զոհերի թիվը հասել է 74 782-ի, իսկ վարակակիրների ընդհանուր թիվը հասել է 1 347 646-ի: Ըստ worldometers.info/coronavirus/-ի տվյալների՝ 286 453 պացիենտ առողջացել է:
Ներկայումս աշխարհում 986 411 պացիենտ բուժում է ստանում, նրանցից 47 396-ի (5 տոկոս) վիճակը ծանր է կամ կրիտիկական:
Կորոնավիրուսն արդեն թափանցել է աշխարհի 209 երկիր եւ տարածքներ: ԱՄՆ-ն նախկինի պես աշխարհում առաջին տեղում է վարակվածների թվով եւ երրորդ՝ մահերի թվով. համաճարակի ամբողջ ընթացքում նահանգներում գրանցվել է վարակման 367 650 եւ մահվան 10 943 դեպք: ԱՄՆ-ում վերջին օրում կորոնավիրուսի հետեւանքով մահացել է 72 պացիենտ, իսկ վարակն ախտորոշվել է 646 նոր պացիենտի մոտ:
Թե՛ վարակվածների թվով, թե՛ մահացությամբ երկրորդ տեղում Իսպանիան է. այստեղ գրանցվել է վարակման 136 675 եւ մահվան 13 341 դեպք:
Այսօր Իտալիան աշխարհում երրորդ տեղում է վարակվածների թվով (132 547) եւ առաջին՝ մահացությամբ (16 523):
Չինաստանն այսօր հիվանդացածների թվով (81 740) աշխարհում 6-րդն է եւ 7-րդը՝ մահերի թվով (3331): Վերջին շաբաթների ընթացքում Չինաստանում ինֆեկցիայի տարածման արագությունը զգալիորեն նվազել է. այստեղ վերջին 24 ժամում գրանցվել է վարակման միայն 32 նոր դեպք: