Բժիշկները փրկել են երեխայի կյանքը, որի գանգը ծակել էր մեծ մկրատը (ֆոտո)
14:20 27 ապրիլի, 2020Չինաստանի Անհոյ նահանգի Ֆույան քաղաքից 2 տարեկան երեխան ողջ է մնացել այն բանից հետո, երբ նրա քունքը ծակել է դերձակի մեծ մկրատը:
Ինչպես հայտնում է The Sun պարբերականը, երբ տղայի ազգականները, ում անունը չի հրապարակվում, հյուրասենյակում հեռուստացույց էին դիտում, նա բարձրացել է աթոռակի վրա, բացել պահարանի դարակը եւ սկսել խաղալ այնտեղ եղած իրերով: Հավասարակշռությունը կորցնելով՝ նա աթոռակից ընկել է, իսկ ձեռքին պահած մկրատը խրվել է նրա գլխի մեջ:
Երեխային անմիջապես տեղափոխել են հիվանդանոց՝ մկրատին ձեռք չտալով:
Նեյրովիրաբույժ Վան Շաոխուայի խոսքով, որը զննել էր երեխային, սայրը նրա գլխի մեջ էր մտել 15 միլիմետր:
«Տղայի բախտը շատ է բերել,- պնդում է նա: - Մկրատը ծակել է նրա գանգն ու ուղեղի թաղանթը, բայց ուղեղի հյուսվածքներն անվնաս են մնացել»:
Սակայն մկրատը գլխից հանելու համար պահանջվել է 2 ժամ տեւած վիրահատություն: Մասնագետների խոսքով՝ երեխան ամբողջությամբ կառողջանա:
