Ե՛ւ սովորական, ե՛ւ էլեկտրոնային ծխախոտը COVID-19-ով պացիենտների մոտ կարող է բարդությունների հանգեցնել․ հետազոտություն
21:10 16 հուլիսի, 2020Ե՛ւ սովորական, ե՛ւ էլեկտրոնային ծխախոտը COVID-19 կորոնավիրուսով վարակված պացիենտների մոտ կարող է ծանր բարդությունների եւ մահվան հանգեցնել: Այս մասին նախազգուշացնում են Սան Դիեգոյում Կալիֆոռնիայի համալսարանի գիտնականները: Նրանց ուսումնասիրությունը հրապարակվել է bioRxiv-ում:
Հետազոտողների խոսքերով՝ սովորական ծխախոտներում նիկոտինը եւ վեյպերում բույրերը նպաստում են բորբոքմանը: Սովորական ծխախոտը նաեւ հանգեցնում է անգիոտենզին ռեցեպտորի բարձր էքսպրեսիայի, ինչը վերափոխում է ֆերմենտ-2-ը (ACE2), որին նոր կորոնավիրուսը օգտագործում է բջիջ ներթափանցելու համար: Էլեկտրոնային ծխախոտները, առկա տվյալներով, նման արդյունք չեն ունեցել:
Գիտնականները նաեւ նշում են, որ նիկոտինով էլեկտրոնային ծխախոտի վնասակար հետեւանքները կապված են շնչուղիների բորբոքման, թոքերի էպիթելային հյուսվածքների վնասվածքների, լորձի բարձր արտադրության, օքսիդացնող սթրեսի եւ ԴՆԹ-ի վնասումների հետ:
Գիտնականների խոսքերով՝ ծխելը կորոնավիրուսով հիվանդների մոտ մեծացնում է սուր շնչառական դիսթրես-համախտանիշի ռիսկը, որը պահանջում է թոքերի մեխանիկական օդափոխություն, եւ ցիտոկինային փոթորկի ռիսկը, այսինքն՝ առաջացնում է համակարգային բորբոքային ռեակցիա, որը կարող է հանգեցնել պոլիօրգանային անբավարարության: