Ծխելուց հրաժարվելը եւ ֆիզիկական ակտիվությունը երկարացնում են կյանքը նույնիսկ մի քանի քրոնիկ հիվանդությունների դեպքում․ հետազոտություն

Նույնիսկ մի քանի քրոնիկ հիվանդություններ ունեցող մարդիկ ավելի երկար կապրեն, եթե հրաժարվեն ծխելուց եւ ֆիզիկապես ակտիվ լինեն: Այս մասին ասվում է նոր հետազոտության մեջ, որի արդյունքները հրապարակվել են PLoS Medicine ամսագրում:

Մինչեւ վերջերս բաց էր մնում այն հարցը, թե կարող է արդյոք առողջ կենսակերպը օգնել մի քանի (երկու կամ ավելի) քրոնիկ հիվանդություններ՝ շաքարային դիաբետ, հիպերտոնիա, բրոնխային ասթմա, միգրեն եւ դեպրեսիա ունեցող մարդկանց ավելի երկար ապրել:

Դա պարզելու համար բրիտանացի գիտնականների խումբը վերլուծել է մոտ 94 000 մարդու առողջությունը եւ կենսակերպը (ֆիզիկական ակտիվությունը, ծխելը, ալկոհոլի օգտագործումը, սննդակարգը), նրանցից յուրաքանչյուրը ունեցել է առնվազն երկու քրոնիկ հիվանդություն: Հետազոտության հեղինակները կենտրոնացել են 36 հիվանդությունների վրա, դիտարկումը տեւել է միջինը 9 տարի:

Ինչպես պարզվել է, ամենաառողջ կենսակերպ ունեցող եւ տղամարդիկ, եւ կանայք միջինը 6,3 տարով եւ 7,6 տարով ավելի երկար են ապրել, քան ավելի քիչ առողջ սովորություններ ունեցող մարդիկ:

Կյանքի տեւողության համար ամենաարժեքավոր սովորությունը, պարզվել է, չծխելն է: 45 տարեկան ծխողները միջինը 6 տարով ավելի քիչ են ապրել, քան չծխողները: Կանոնավոր ֆիզիկական վարժությունները կապված են 2,5 տարվա կյանքի հետ: Հետաքրքիր է, որ առողջ սնունդը եւ ալկոհոլից հրաժարվելը ավելի քիչ արտահայտված ազդեցություն են ունեցել կյանքի տեւողության վրա: