Մելատոնինը կարող է ազդել կորոնավիրուսի ընթացքի վրա՝ պարզել են Կոլումբիական համալսարանի գիտնականները:
Ինչպես հայտնում է ՏԱՍՍ-ը, գիտնականները վերլուծել են կորոնավիրուսի ծանր ընթացքով պացիենտների հոսպիտալացման 800 դեպք, բոլոր այդ պացիենտները միացված են եղել ԹԱՕ սարքերին: Պարզվել է, որ հիվանդության ընթացքի վրա դրական է ազդում մելատոնինը, որի ներարկումը մեծացրել է վերակենդանացման բաժանմունքում ողջ մնալու շանսերը:
Հետազոտությունը ցույց է տվել, որ մելատոնին ստացած պացիենտների շրջանում մահացության թիվը 10 անգամ քիչ է եղել:
Նման էֆեկտ է նկատվել նաեւ հակաբորբոքային դեքսամետազոն, տրազոդոն, բենզոդիազեպին եւ կվետիապին ընդունելուց հետո:
Գիտնականները դեռ հստակ չգիտեն՝ այդ իրավիճակում կոնկրետ ինչպես է աշխատում մելատոնինը, որը պատասխանատու է քնի կարգավորման համար: Հնարավոր է, որ այն օգնում է ճնշել բորբոքումը: