Կորոնավիրուսով 2000 պացիենտ կա հիվանդանոցներում. առողջապահական համակարգը կարող է կոլապսի առջեւ հայտնվել
22:18 22 հոկտեմբերի, 2020Այս պահի դրությամբ Հայաստանի հիվանդանոցներում կորոնավիրուսային վարակով մոտ 2000 պացիենտ է բուժվում: Շատ են նաեւ հիվանդները, ովքեր հոսպիտալացման կարիք ունեն, սակայն ստիպված են սպասել, որ հիվանդանոցներից մեկում տեղ ազատվի եւ որ իրեն կարողանան ընդունել: Այս մասին լրագրողների հետ զրույցում հայտնեց ՀՀ ԱՆ հիվանդությունների վերահսկման եւ կանխարգելման ազգային կենտրոնի բժիշկ-համաճարակաբան Լուսինե Պարոնյանը:
Նրա խոսքով՝ քիչ չեն դեպքերը, երբ ծանր հիվանդներին ստացիոնար պայմաններում բուժում են մեկ-երկու օր, վիճակը կայունացնում են եւ դուրս գրում, որպեսզի կարողանան հաջորդ պացիենտներին ընդունել:
Մասնագետի խոսքով՝ չնայած առողջապահական համակարգի ռեսուրսները անընդհատ ընդլայնվում են, անընդհատ նոր հիվանդանոցներ են վերապրոֆիլավորվում, վարակակիրների թվի աճը կարող է բերել նրան, որ համակարգը կոլապսի առջեւ հայտնվի, եւ հիվանդանոցներում այլեւս տեղ չլինի ծանր հիվանդներին ընդունելու համար:
Այս իրավիճակի պատճառը, ինչպես նշեց Լուսինե Պարոնյանը, կորոնավիրուսով վարակված մարդկանց թվի զգալի աճն է, որը գրանցվում է վերջին օրերին. ամեն օր մոտ 500 դեպքով ավելի է գրանցվում, քան նախորդ օրը, եւ դա լուրջ խնդիր է առողջապահական համակարգի համար:
Թվերի աճն էլ պայմանավորված է նրանով, որ պատերազմական իրավիճակում բոլորի ուշադրությունը ռազմաճակատի կողմն է ուղղված, եւ կորոնավիրուսը կարծես երկրորդ պլան է մղվել: Սակայն, մասնագետի խոսքով, չի կարելի մոռանալ, որ այս իրավիճակում բժիշկները եւ առողջապահական ռեսուրսները անհրաժեշտ են նաեւ Ադրբեջանի ագրեսիայի հետեւանքով վիրավորված զինվորներին:
Լուսինե Պարոնյանի խոսքով՝ Հայաստանն արդեն ունի կորոնավիրուսի տարածման դեմ պայքարի հաջողված փորձ. երբ մարդիկ խստորեն հետեւում էին հակահամաճարակային կանոններին, հիվանդացությունը զգալիորեն նվազել էր:
Հիմա եւս, մասնագետի խոսքով, անհրաժեշտ է սկսել խստորեն հետեւել երեք պարզ կանոններին՝ կրել դիմակ, լվանալ ձեռքերը եւ սոցիալական հեռավորություն պահպանել:
"Հիշենք մեր ռազմաճակատի մասին. Մենք պիտի ամուր լինենք, մենք պիտի ունենանք առողջ թիկունք, որ կարողանանք ապահովել մեր զինվորների առողջությունը", - ասաց մասնագետը: