Հետաքրքիր կլինիկական դեպք. տղամարդը քիչ էր մնում մահանար ցրտի նկատմամբ ալերգիայի պատճառով

Ցրտի նկատմամբ ալերգիան քիչ էր մնում դառնար Կոլորադո նահանգից 34-ամյա տղամարդու մահվան պատճառ: Այս հետաքրքիր կլինիկական դեպքը նկարագրվել է The Journal of Emergency Medicine-ում:

Բժիշկները պատմել են, որ պացիենտը կորցրել է գիտակցությունն այն բանից հետո, երբ տաք լոգանք է ընդունել եւ դուրս է եկել լոգասենյակից: Երբ նրան գտել են նրա հարազատները, նա պառկած է եղել հատակին, իսկ մաշկը պատված է եղել բշտիկներով, եւ նա դժվար է շնչել:

Հարազատները շտապ օգնություն են կանչել եւ հայտնել մասնագետներին, որ պացիենտի մոտ նախկինում եւս ցուրտ եղանակի նկատմամբ ալերգիկ ռեակցիաներ են եղել:

Հիվանդանոցում պացիենտի մոտ ախտորոշել են այսպես կոչված «ցրտի եղնջատենդ», իսկ ախտորոշման համար օգտագործել են սառույց: Մաշկի հատվածում, որի վրա սառույց են դրել, պացիենտի մոտ իսկապես բշտիկներ են հայտնվել:

Բուժումից հետո տղամարդուն դուրս են գրել հիվանդանոցից առանց ալերգիկ ախտանիշների: Նա պետք է ադրենալինով ներարկիչ օգտագործի, որպեսզի կարողանա ինքն իրեն օգնել անաֆիլակտիկ շոկի դեպքում: