Հաճախ կծու կարմիր պղպեղ ուտողներն ավելի հազվադեպ են մահանում սրտի հիվանդություններից

Մարդիկ, ովքեր պարբերաբար կծու կարմիր պղպեղ են ուտում, սովորաբար ավելի երկար են ապրում եւ ավելի հազվադեպ են մահանում սրտի հիվանդությունից: Սա մասին հայտնել են Ամերիկյան սրտաբանական ասոցիացիայի վիրտուալ համաժողովին ներկայացված նոր հետազոտության հեղինակները, հայտնում է մամուլի հաղորդագրության մեջ:

Ինչպես հայտնում է Medportal.ru-ը, կարմիր պղպեղը կապսաիցին է պարունակում, որը, ինչպես համարվում է, կարող է բարելավել սրտանոթային համակարգի գործունեությունն ու նյութափոխանակությունը: Հայտնի են նաեւ դրա պաշտպանիչ հատկություններն աթերոսկլերոզի դեմ: Կարծիք կա, որ կապսաիցինը հակաքաղցկեղային ակտիվություն ունի: Սակայն արդյո՞ք այդ ազդեցությունները բավականաչափ արտահայտիչ են մարդկային կյանքը երկարացնելու համար: Միեւնույն ժամանակ, մտավախություններ կան, որ այդ նյութը մեծ քանակությամբ կարող է մեծացնել ստամոքսի քաղցկեղի առաջացման հավանականությունը:

Կծու կարմիր պղպեղի` առողջության վրա ազդեցությունը վերլուծելու համար նոր հետազոտության հեղինակներն այս խնդրի վերաբերյալ ավելի քան 4700 հետազոտություն են ուսումնասիրել եւ տվյալներ են հավաքել 570 000 մարդու մասին:

Գիտնականները պարզել են, որ այն մարդկանց համեմատ, ովքեր հազվադեպ կամ երբեք չեն օգտագործում կարմիր կծու պղպեղ, նրանք, ովքեր պարբերաբար այն օգտագործում են.

. սրտանոթային հիվանդություններից մահացությունը 26 տոկոսով ցածր է,

. քաղցկեղից մահացությունը 23 տոկոսով ցածր է,

. բոլոր պատճառներից մահացությունը ցածր է 25 տոկոսով:

«Հատուկ մեխանիզմներ, որոնք կարող են բացատրել մեր արդյունքները, ներկայումս հայտնի չեն: Ուստի անհնար է վստահորեն ասել, որ կարմիր պղպեղը երկարացնում է կյանքը եւ նվազեցնում մահվան վտանգը: Այս նախնական արդյունքները հաստատելու համար պատահականորեն վերահսկվող փորձարկումների ավելի շատ տվյալներ են անհրաժեշտ»,- ասել է Քլիվլենդի կլինիկայի սրտաբան, հետազոտության համահեղինակ Բո Զյուն: