Հազվագյուտ հիվանդության պատճառով տղան ստիպված է ապրել մթության մեջ
11:23 1 դեկտեմբերի, 202018-ամսական Ջորջ Մեդեռնը Ավստրալիայի Վիկտորիա նահանգից ստիպված է մթության մեջ ապրել ուլտրամանուշակագույն ճառագայթման նկատմամբ մաշկի զգայունության պատճառով:
Ինչպես պատմում է NZ Herald-ը, տղան ծնվել է հազվագյուտ հիվանդությամբ` պիգմենտային քսերոդերմայով: Այս հիվանդությունը 10.000 անգամ բարձրացնում է մաշկի քաղցկեղի ռիսկը, եւ 25 տոկոս հավանականություն կա, որ արեւի լույսը կարող է ազդել տղայի տեսողության, լսողության եւ նյարդային համակարգի վրա: Քսերոդերման անբուժելի է:
Ուլտրամանուշակագույն լույսի նկատմամբ չափազանց զգայունության պատճառով երեխան եւ նրա ծնողները բազմաթիվ խնդիրների են բախվում: Ցերեկը տանը բոլոր փեղկերը պետք է փակ լինեն, իսկ պատուհանները վարագույրով ծածկվեն: Դուրս գալու համար երեխան պետք է փաթաթվի ծածկոցների մեջ եւ ձեռնոցներ դնի, քանի որ մաշկի ոչ մի հատված չպետք է հայտնվի արեւի ճառագայթների տակ:
«Այս ախտորոշումը նշանակում է, որ Ջորջը չի կարող դրսում խաղալ, մոտենալ ուլտրամանուշակագույն ճառագայթումից չպաշտպանված պատուհաններին եւ նույնիսկ հաճախել ցանկացած միջոցառման, եթե այդ վայրում հալոգեն լամպեր են օգտագործվում»,- պատմել է երեխայի հորեղբայրը:
Երեխան արդեն հոսպիտալացվել է դեմքի ծանր այրվածքներով` առանց պաշտպանության արեւի տակ կարճ ժամանակ անցկացնելուց հետո:
Ընտանիքը ցանկանում է հատուկ տնակ կառուցել երեխայի համար, որը որպես խաղահրապարակ կծառայի: Բացի այդ, տղայի ծնողները նախատեսում են երանգավորել տան եւ ավտոմեքենայի ապակիները, ուլտրամանուշակագույն ճառագայթման մակարդակը չափող սենսորներ տեղադրել եւ ուլտրամանուշակագույնից պաշտպանության հագուստ գնել: Դրա համար նրանք դրամահավաք են սկսել, որի արդյունքում արդեն հաջողվել է ավելի քան 63.000 ավստրալական դոլար հավաքել: