Գիտնականները մշակել են գրիպի բոլոր վիրուսների դեմ աշխարհում առաջին ունիվերսալ պատվաստանյութը

Նյու Յորքի Մաունթ Սինայ հիվանդանոցից գիտնականները ներկայացրել են գրիպի շտամների ընդարձակ սպեկտրի եւ ենթատեսակների դեմ աշխարհում առաջին ունիվերսալ պատվաստանյութի նախնական կլինիկական փորձարկումների արդյունքները: Արդյունքները հրապարակվել են Nature Medicine ամսագրում:

Պատվաստանյութը ստեղծվել է քիմերային հեմագլյուտինինի (HA) հիմքի վրա: Գիտնականների խոսքով՝ այս պատվաստանյութի կիրառման դեպքում գրիպի դեմ ամենամյա պատվաստման անհրաժեշտությունը վերանում է:

Գրիպի դեմ սովորական պատվաստանյութերն արտադրում են չեզոքացնող հակամարմիններ՝ ուղղված HA հատուկ դոմենին, որը վիրուսի թաղանթին գտնվող սպիտակուց է եւ ախտածինին օգնում է փոխգործակցել բջջի ռեցեպտորների հետ ու թափանցել դրա մեջ: Խնդիրն այն է, որ այդ դոմենը կարող է մուտացիայի ենթարկվել, ինչն էլ նպաստում է վիրուսի նոր շտամների ի հայտ գալուն, որոնք անընկալունակ են գոյություն ունեցող բոլոր պատվաստանյութերի հանդեպ: Հենց այս պատճառով են ստիպված գրիպի դեմ պատվաստել ամեն սեզոնին:

Իսկ նոր մշակումն ուղղված է HA-ի այլ հատվածի դեմ, որը մուտացիաների ավելի քիչ է ենթարկվում, ինչը թույլ է տալիս չեզոքացնել վիրուսների տարբեր շտամներ:

ԱՄՆ-ում կլինիկական փորձարկումների առաջին փուլի ժամանակ մասնագետները պատվաստանյութի անվտանգությունն ու իմունածնությունը գնահատել են 65 կամավորների մոտ: Պարզվել է, որ պատվաստանյութը կարող է առաջացնել ուժեղ իմունային պատասխան, որը պահպանվել է 18 ամսից ոչ պակաս: