Ի՞նչ խնդիրներ կարող են ստեղծել կորոնավիրուսի նոր շտամները

Կորոնավիրուսի նոր մուտացված շտամները, որոնք հայտնաբերվել են Մեծ Բրիտանիայում, Հարավային Աֆրիկայում եւ Բրազիլիայում, կարող են աննշան նվազեցնել պատվաստանյութերի արդյունավետությունը, սակայն պատվաստանյութերը, այնուամենայնիվ, կարող են ապահովել պաշտպանությունը կորոնավիրուսից: Այս  մասին հայտնում են Ռոքֆելերի համալսարանի գիտնականներն ու այլ հետազոտության կազմակերպություններ:

MedicalXpress-ի հաղորդմամբ՝ գիտնականները արյան նմուշներ են վերցրել 20 մարդուց, որոնք ստացել են Moderna-ի կամ Pfizer-ի պատվաստանյութերը, եւ թեստավորել են նրանց հակամարմինները վիրուսային տարբեր մուտացիաների դեմ լաբորատոր պայմաններում: Հակամարմինների ակտիվությունը եղել է 3 անգամ ցածր՝ կախված մուտացիայից:

Վիրուսների գենետիկական բազմազանության աճի հիմնական պատճառ է համարվում վարակման նոր դեպքերի թվի աճը: Վիրուսի նոր տարբերակները հեշտ են տարածվում, եւ դա կարող է հանգեցնել հիվանդության, մահվան եւ հոսպիտալացման դեպքերի թվի աճի:

Գիտնականների խոսքով՝ դեռ չի կարելի ասել, որ առկա պատվաստանյութերը հնացել են, սակայն մուտացիաներն իսկապես ազդում են իմունային համակարգի՝ վիրուսը ճանաչելու եւ դրա դեմ պայքարելու ունակության վրա: