Ինչո՞ւ են երեխաներն ու դեռահասներն արյան բարձր ճնշում ունենում
11:13 23 մարտի, 2021Զարկերակային հիպերտենզիան կարող է զարգանալ ոչ միայն մեծահասակների, այլ նաեւ երեխաների եւ դեռահասների մոտ: Սրտաբան Յուլիա Մարշինցեւայի (Ռուսաստան) կարծիքով՝ դա կարող է մի քանի պատճառ ունենալ:
Ըստ նրա՝ երեխաների մոտ սովորաբր այնպիսի երկրորդային հիպերտենզիա է հանդիպում, որը ոչ անոթային պատճառ ունի եւ պայմանավորված է հորմոնալ, երիկամների կամ մակերիկամների հետ կապված խնդիրներով:
Որոշ դեպքերում անչափահասների մոտ արյան բարձր ճնշումը կարող է առաջանալ գերհոգնածության եւ քնի պակասի պատճառով:
«Գաջեթները եւս կարող են բարձրացնել արյան ճնշումը, ինչպես նաեւ, այսպես կոչված, վեգետատիվ-անոթային դիստոնիայի հանգեցնել»,- նշել է մասնագետը:
Մեծահասակների մոտ հիպերտենզիան սկսվում է այլ պատճառներով, օրինակ՝ նյարդաբանական: Հաճախ այդպիսի խնդիր առաջանում է այն մարդկանց մոտ, ովքեր քիչ են քնում, հոգնում են աշխատանքի ընթացքում եւ ծխում են: Ընդ որում, ծխելն արյան ճնշման հետ կապված խնդիրների զարգացման համար որպես լրացուցիչ ռիսկի գործոն է հանդես գալիս:
«Երբ մարդը բավականաչափ քնում կամ հանգստանում է, ապա առանց հաբերի ամեն ինչ ինքնաբերաբար անցնում է»,- ասել է Մարշինցեւան «Զվեզդա» հեռուստաալիքին:
Սրտաբանը հավելել է, որ տարիքի հետ անոթները կորցնում են իրենց առաձգականությունը, ուստի անհրաժեշտ է դրանք ամրացնել սպորտով, արյան մեջ խոլեստերինի մակարդակի վերահսկմամբ: