5 հետաքրքիր փաստ մեր մկանների մասին
20:45 14 մայիսի, 2021Գիտե՞ք արդյոք, որ օրգանիզմի ամենադիմացկուն մկանը սիրտամկանն է, իսկ ամենաուժեղը` ծնոտայինը: Ձեր ուշադրությաննն ենք ներկայացնում մի քանի հետաքրքիր փաստեր մեր մկանների մասին:
- Մեր մարմնում մոտ 640 մկան կա
Մարդու մարմնում գրեթե 640 մկան կա: «Գրեթե»՝ քանի որ տարբեր մարդկանց մոտ դրանք կարող են տարբեր քանակի լինել: Օրինակ՝ ոչ բոլորն ունեն ափի երկար մկան՝ կենդանիների մոտ այս մկանն օգտագործվում է ճանկեր արձակելու համար, բայց մարդիկ դրա կարիքը չունեն, ուստի ռուդիմենտար տեսքով այն պահպանվել է որոշ մարդկանց մոտ՝ միայն մի ձեռքում, իսկ ոմանց մոտ այն նդհանրապես չի պահպանվել:
- Քայլ կատարելու համար պետք է մոտ 200 մկան օգտագործել
Ընդամենը 1 քայլ կատարելու համար մեր մարմինը ստիպված է մոտ 200 մկան օգտագործել: Դրանցից որոշները պատասխանատու են ճկման համար, մյուսները՝ վերջույթները ձգելու, երրորդները՝ հավասարակշռությունը պահելու եւ այլնի համար:
- Տարիքի հետ մենք կորցնում ենք մկանային զանգվածը
40 տարեկանից հետո օրգանիզմը սկսում է կտրուկ կորցնել մկանային զանգվածը` տարեկան մինչեւ 3%: 60 տարեկանից հետո գործընթացն արագանում է մինչեւ 5% կամ ավելի: Բայց ակտիվ կենսակերպ վարելու եւ մկանները աշխատանքային վիճակում պահելու դեպքում մկանների կորստի գործընթացը կդանդաղի:
- Սրտամկանը օրգանիզմում ամենադիմացկունն է
Սրտամկանը օրգանիզմում ամենադիմացկունն է, չէ՞ որ այն անընդհատ աշխատում է մեր ողջ կյանքի ընթացքում: Համարվում է, որ նորմալ պայմաններում դրա ամրության ներուժը բավարար է 100 տարի կամ ավելի:
- Օրգանիզմում ամենաուժեղ մկանը ծնոտայինն է
Օրգանիզմում ամենաուժեղ մկանը ծնոտայինն է: Ծնոտային մկանի սեղմման ուժը կարող է հասնել 390 կգ-ի: