Ինչպիսի կոշիկներն են առավելագույնս վնասում մեր ոտքերը
17:57 23 օգոստոսի, 2021Կոշիկի որոշ տեսակներ ոչ միայն անհարմար են, այլեւ կարող են լրջորեն վնասել մեր ոտքերը: Դիտարկենք դրանցից մի քանիսը.
Բարձրակրունկ կոշիկներ
Պատահական չէ, որ բարձրակրունկ կոշիկները ամենավտանգավորն են համարվում: Խոսքը ոչ միայն վնասվածքների եւ կոտրվածքների ռիսկի ավելացման մասին է, այլեւ այն մասին, որ ավելի քան 7 սանտիմետր բարձրության դեպքում ծանրության կենտրոնը ուժեղ տեղաշարժվում է դեպի ոտնաթաթի առջեւի հատվածը եւ հանգեցնում է կոշիկի մեջ մատների սեղմման: Այս ամենը նպաստում է լայնակի հարթաթաթության եւ ոտնաթաթի վալգուսային դեֆորմացիայի՝ բութ մատի թեքմամբ (hallux valgus):
Նեղ ծայրով կոշիկներ
Եթե կոշիկի առջեւի մասը չափազանց նեղ է, եւ ոտքի մատներն անհրաժեշտ ազատությունը չունեն, դրանք միշտ գտնվում են անհարմար, անբնական վիճակում: Ժամանակի ընթացքում դա հանգեցնում է առաջին մատի մետատարսոֆալանգալ հոդի դեֆորմացիայի: Արդյունքում առաջանում է նույն «ոսկորը», ինչպես նաեւ՝ ոտքի մատների մշտական ցավ:
Տափակ ներբաններով կոշիկներ
Ամբողջովին տափակ կոշիկները, ինչպիսիք են «բալետկաները» եւ սպորտային կոշիկները, նույնպես վնասակար են՝ կրունկի հաշվին թեքության բացակայության պատճառով ծանրության կենտրոնը տեղափոխվում է ոտնաթաթի հետին մաս, եւ աքիլլեսյան ջիլում մեծ ծանրաբեռնվածություն է առաջանում:
Բացի այդ, տափակ ներբանը չի կարող ասֆալտի մակերեւույթի վրա գարշապարի հարվածի ամորտիզացիա ապահովել, եւ հեռանկարում դա հղի է հարթաթաթության զարգացմամբ կամ խորացմամբ եւ ոտնաթաթի հոդերի արթրոզով: