Ի՞նչ անել ջերմային հարվածի դեպքում

Ջ​երմային հյուծման դեպքում պատշաճ օգնություն չստանալու դեպքում, այն կարող է վերածվել ջերմային հարվածի, որն առավել վտանգավոր է:

Ջերմային հարվածի հիմնական ախտանիշներն են.

• մարմնի ջերմաստիճանի բարձրացում մինչեւ 40-42 աստիճան,
• քրտնարտադրության լիովին բացակայություն,
• շփոթվածություն, ապակողմնորոշվածություն,
• կարմիր եւ տաք ու չոր մաշկ. երբեմն ջերմային հարվածի դեպքում մաշկը կարող է խոնավ լինել,
• գիտակցության կորուստ,
• սրտխառնոց, փսխում, փորլուծություն,
• ուժեղ սրտխփոց,
• ուժեղ գլխացավ,
• բոլոր մկանների ջղաձգում,
• ուժեղ թուլություն եւ/կամ գլխապտույտ:
  
  

Եթե ​ նկատել եք այս ախտանիշներից մեկը կամ մի քանիսը դրսում կամ այլ տաք միջավայրում գտնվելիս, անհապաղ զանգահարեք շտապ օգնություն: Տուժածին պետք է տեղափոխել մոտակա հիվանդանոց:

Մինչ մասնագետների ժամանումը, խորհուրդ է տրվում անել հետեւյալ գործողությունները.

• տուժածին տեղափոխել տուն կամ ստվերոտ վայր եւ հանել հագուստը,
• տուժածը պետք է սառը ջրով լոգանք ընդունի, ինչը կօգնի արագ հովանալ,
• եթե սառը ջրով լոգանքի հնարավորություն չկա, տուժածի վրա սառը թրջոցներ դրեք եւ փոխեք դրանք, նախքան կհասցնեն տաքանալ,
• եթե տուժածն անգիտակից կամ կիսագիտակից վիճակում է, մի փորձեք հեղուկ լցնել նրա բերանը, քանի որ կարող է շնչահեղձ լինել:

Ջերմային հարվածի ժամանակ հիպերտերմիայի կանխարգելման համար անհրաժեշտ է հետեւել, որպեսզի տուժածն օրական առնվազն 70-100 մլ/կգ հեղուկ խմի: Խորհուրդ չի տրվում գազավորված ըմպելիքներ խմել, առավել նախընտրելի են սովորական ջուրը կամ թեյը: