Սենյակի օդափոխումը կրկնակի նվազեցնում է SARS-CoV-2 կորոնավիրուսի բեռը: Այս եզրակացությանն են եկել Օրեգոնայի համալսարանի գիտնականները:
Medportal.ru-ի փոխանցմամբ՝ նոր հետազոտության ընթացքում մասնագետները հետեւել են 35 ուսանողների, որոնց մոտ 2021 թվականի հունվարից մինչեւ մայիս կորոնավիրուս է եղել, եւ նրանք 10 օր անցկացրել են կարանտինում՝ հանրակացարանի առանձին սենյակներում:
Յուրաքանչյուր սենյակում գիտնականները տեղադրել են Պետրիի ամաններ, ինչպես նաեւ օդում աերոզոլները որսալու հատուկ սարքեր: Օրական մի քանի անգամ նրանք հավաքել են բոլոր սենյակների մակերեւույթների նմուշները եւ վարակված ուսանողների քթաըմպանից քսուքներ են վերցրել:
Այնուհետեւ հետազոտողները վերլուծել են բոլոր նմուշները, որպեսզի ստուգեն ՊՇՌ թեստի օգնությամբ հայտնաբերված վիրուսի առկայությունը: Արդյունքները հստակ կապ են ցույց տվել վերին շնչուղիներում վիրուսային բեռի եւ տարածքում վիրուսային մասնիկների քանակի միջեւ: Նույնիսկ անախտանիշ կրողները մեծ թվով վիրուսներ են արտազատել եւ կարող էին պոտենցիալ վտանգ ներկայացնել ուրիշների համար: Ուսանողների ապաքինման հետ մեկտեղ, երբ վիրուսային բեռը աստիճանաբար նվազել է, սենյակում շրջանառվող աերոզոլների պաթոգենի քանակը նույնպես նվազել է:
Գիտնականները հաշվարկել են նաեւ յուրաքանչյուր սենյակի մեխանիկական օդափոխության ինտենսիվությունը եւ ուսանողներին խնդրել են հայտնել, թե որքան հաճախ են նրանք բացել պատուհանները: Պարզվել է, որ միջին վիրուսային բեռը կրկնակի նվազել է այն սենյակներում, որոնք պարբերաբար օդափոխվել են: