Գիտնականները բացահայտել են կապն անքնության ախտանշանների եւ ճանաչողական գործառույթների միջեւ

Հելսինկիի համալսարանում անցկացված հետազոտության ժամանակ ուսումնասիրվել են միջին տարիքում անքնության առաջացման ախտանշանները եւ դրանց ազդեցությունը հիշողության, սովորելու ունակության եւ ուշադրության կենտրոնացման վրա թոշակի անցնելուց հետո: Ուսումնասիրության ժամանակահատվածը կազմել է 15-17 տարի, գրում է News Medical Life Sciences-ը:

Հետազոտության արդյունքների համաձայն՝ երկարատեւ անքնության ախտանշանները եւ ճանաչողական գործառույթի վատթարացումն ավելի ուշ շրջանում հստակ կապ ունեն:

Հետազոտությունը ցույց է տվել նաեւ, որ հիշողության, ինչպես նաեւ ուշադրության կենտրոնացման  հետ կապված խնդիրները ավելացել են անքնության ախտանշանների տեւողության հետ մեկտեղ:

Նախկին ուսումնասիրությունները ցույց էին տվել, որ կան մի շարք մեխանիզմներ, որոնք կարող են բացատրել, թե ինչպես քունը կարող է ազդել ճանաչողական գործառույթների վրա:
 

Հետազոտության արդյունքում պարզվել է նաեւ, որ եթե անքնության ախտանշանները ժամանակի հետ մեղմանում են, ապա ճանաչողական գործառույթները հետագա տարիներին նույնպես բարելավվում են: