Վիկտոր Չանգի սրտաբանական հետազոտությունների ինստիտուտի եւ Սիդնեյում Սուրբ Վինսենթի հիվանդանոցի գիտնականները հուսով են, որ նոր վիրտուալ բիոպսիան, որը նախատեսված է սրտի մերժման ցանկացած նշաններ հայտնաբերելու համար, կընդունվի ամբողջ աշխարհի կլինիկական բժիշկների կողմից, գրում է Medical Xpress-ը:
Աշխարհում տարեկան մոտ 3500 մարդու սրտի փոխպատվաստում է կատարվում։ Հիվանդների մեծ մասը զգում է օրգանի մերժման ինչ-որ ձեւ, եւ չնայած գոյատեւման բարձր ցուցանիշներին, հիվանդների փոքր տոկոսը մահանում է վիրահատությունից հետո առաջին տարվա ընթացքում:
Վիկտոր Չանգի սրտաբանության հետազոտությունների ինստիտուտի դոցենտ Էնդրյու Ջաբուրն ասում է, որ նորույթը կհանգեցնի զգալի բարելավման աշխարհի հազարավոր փոխպատվաստված հիվանդների խնամքի հարցում:
«Այս նոր վիրտուալ բիոպսիան ավելի քիչ ժամանակ է զբաղեցնում, ոչ ինվազիվ է, ավելի քիչ ծախսատար է, չի պահանջում ճառագայթման կամ կոնտրաստային նյութեր, եւ, որ ամենակարեւորն է, պացիենտները հենց սա են նախընտրում»,- ասել է նա:
Ներկայումս ամբողջ աշխարհում կլինիկական բժիշկների մեծամասնությունը մերժումը բիոպսիայի միջոցով է ստուգում, որն օգնում է որոշել իմունոպրեսիվ թերապիայի մակարդակն ու համապատասխանությունը՝ հետագա մերժումը բուժելու եւ կանխելու համար:
Այս ինվազիվ պրոցեդուրան ներառում է պարանոցային երակի մեջ խողովակի տեղադրում, որը թույլ է տալիս վիրաբույժներին բիոպսիայի գործիք մտցնել սրտի մեջ եւ սրտի հյուսվածքի մի քանի նմուշ վերցնել:
Բացի անհարմարությունից, այն կարող է հանգեցնել նաեւ հազվագյուտ, բայց լուրջ բարդությունների, եթե սիրտը ծակված է կամ փականը վնասված է: Փոխպատվաստումից հետո առաջին տարվա ընթացքում պացիենտները սովորաբար մոտ 12 անգամ բիոպսիայի են ենթարկվում։
Նոր մեթոդն ապացուցել է, որ մերժումը հայտնաբերելու հարցում ճշգրիտ է եւ գործում է սրտի այտուցի մակարդակի վերլուծության միջոցով, որը, ինչպես ցույց է տվել թիմը, սերտորեն կապված է սրտի բորբոքման հետ: