Իրկուտսկում բժիշկներն ատամ են հեռացրել 14-ամյա աղջկա քթից
21:19 15 հունիսի, 2022Իրկուտսկի Իվանո-Մատրենինսկի մանկական կլինիկական հիվանդանոցի քիթ-կոկորդ-ականջ բաժանմունքի բժիշկները հազվագյուտ վիրահատություն են կատարել. վիրաբույժները 14-ամյա աղջկա քթից ատամ են հանել, հայտնում է IRK.ru-ն՝ վկայակոչելով հիվանդանոցի մամուլի ծառայությունը։
Երիտասարդ հիվանդի հոր խոսքով՝ իրենք իմացել են, որ դստեր քթի մեջ ատամ է աճում, երբ աղջնակը դեռ փոքր էր: Այս ամբողջ ընթացքում այն չէր խանգարել երեխային նորմալ ապրել։ Սակայն երկու տարի առաջ աղջիկը սկսել էր նկատել, որ իր դժվարանում է շնչել, քթից արյունահոսություններ էին սկսվել։ Այդ ժամանակ ծնողները դիմեցին մասնագետներին։
«Անցկացված հետազոտությունները, այդ թվում՝ բազմաշերտ համակարգչային տոմոգրաֆիան, ցույց տվեցին, որ ատամը գտնվում է քթի աջ կողմի խոռոչի ստորին հատվածում եւ փակում է անցքը, ինչի պատճառով քթով շնչելը դժվարանում է, ընդ որում, ատամն արմատով դեպի ներքեւ էր: Ուստի որոշում կայացվեց շարունակել պլանային բուժումը։ Ընդհանուր անզգայացման տակ մենք մաքրեցինք մոտակա հյուսվածքները եւ հեռացրեցինք ատամը: Քիթն անմիջապես սկսեց լավ շնչել, հիվանդը բավարար վիճակում դուրս է գրվել հիվանդանոցից»,- պատմել են Իվանո-Մատրենինսկի հիվանդանոցի բժիշկները։
Ավելի հաճախ այդպիսի «օտար մարմիններ» հայտնաբերվում են դիմածնոտային սինուսում, բայց դրանք կա՛մ ատամների ծլած արմատներ են, կա՛մ ատամի մասերի մնացորդներ, կա՛մ նույնիսկ անորակ բուժումից հետո մնացած պլոմբավորման նյութ։ Այսպես կոչված ատամների էկտոպիան (դիրքի փոփոխություն՝ հիմնական ծամելու գծից այն կողմ դուրս գալով) կարող է հանդիպել աշխարհի բնակչության միայն 1-4 տոկոսի մոտ, իսկ քթի մեջ աճելով՝ էլ ավելի հազվադեպ։