Հայտնի են ինֆարկտի ամենաանսովոր նշանները
21:25 23 հունիսի, 2022Ինֆարկտը կարող է քողարկվել որպես ատամի ցավ եւ որովայնի ցավ, «Մոսկվա 24»-ին ասել է թերապեւտ Նադեժդա Չեռնիշովան։
Սովորաբար ինֆարկտի բնորոշ ախտանիշ է ծանրության զգացումը եւ ճնշումը կրծոսկրի հետեւի մեջտեղի մասում: Բայց որոշ դեպքերում այն կարողանում է «այլ հիվանդությունների դիմակներ հագնել»,- զգուշացնում է մասնագետը։ Ուստի, սպառնալիքի աստիճանը կարելի է շփոթել ուրիշ՝ ավելի քիչ լուրջ վիճակի հետ, նշում է Չեռնիշովան։
«Ատամի ցավը կարող է ինֆարկտի նշան լինել։ Որպես կանոն՝ կարող է ցավել ստորին ծնոտի ձախ կողմում գտնվող ատամը, բայց կարող է նաեւ աջ կողմինը: Սա ուժեղ ցավ է առանց որեւէ ակնհայտ պատճառի: Այսինքն՝ եթե ատամը ցավում է, իսկ բժիշկը չի գտնում հիվանդ ատամ, ապա շտապ ԷԿԳ պետք է անել»,- ասել է թերապեւտը։
Ինֆարկտի մասին կարող է ազդարարել նաեւ որովայնի ուժեղ ցավը, շարունակում է մասնագետը։
«Կարող է լինել որովայնի կամ ստամոքսի սուր ցավ, կամ այլ բան, մի տեսակ աբդոմինալ համախտանիշ: Այս ամենը շատ է դժվարացնում ինֆարկտի ախտորոշումը»,- պարզաբանում է փորձագետը։
Ցանկացած տարօրինակ դրսեւորման դեպքում Չեռնիշովան խորհուրդ է տալիս անհապաղ դիմել բժշկի՝ թանկարժեք ժամանակը չկորցնելու եւ հիվանդությունը արագ ախտորոշելու համար։