Արվեստը կարող է գիտությունը «թարգմանել» բնակչության լայն շերտերի համար. Երևանում տեղի է ունենում USERN 2023 համաժողովը
17:00 8 նոյեմբերի, 2023Ամեն տարի ամբողջ աշխարհում անցկացվում են հարյուրավոր, նույնիսկ հազարավոր գիտաժողովներ և համաժողովներ՝ նվիրված գիտության տարբեր ոլորտներին։ USERN-ի համաժողովը տարբերվում է շատ ուրիշներից նրանով, որ այն համատեղում է գիտությունն ու արվեստը: Արվեստը, ըստ USERN-ի խորհրդատվական և քաղաքականության խորհրդի անդամ Նիմա Ռեզայիի, օգնում է բարդ հասկացություններն ու գիտական կոնցեպցիաները հասցնել բնակչության լայն շերտերին:
«Երբեմն շատ դժվար է պարզ լեզվով բացատրել բարդ խնդիրներն ու գիտական կոնցեպցիաները, այնպես, որ դրանք հասկանալի լինեն բնակչությանը։ Այս հարցում մեզ կարող է օգնել արվեստը: Արվեստը կարող է գիտությունը «թարգմանել» մի «լեզվի», որն ավելի հասկանալի է հանրության լայն շերտերին»,- NEWS.am Medicine-ին տված հարցազրույցում նշել է նա։
Այսպես, երաժշտության, նկարների և թատերական բեմադրությունների միջոցով հնարավոր է ցույց տալ ինչպես բարդ հույզերը, այնպես էլ որոշ հիվանդությունների առանձնահատկությունները: Օրինակ՝ նոյեմբերի 10-ին, կոնգրեսի շրջանակներում նախատեսվում է Ալցհեյմերի հիվանդությանը նվիրված թատերական ներկայացում։
Արվեստն օգնում է հասնել դեռևս 2015 թվականին հիմնադրված կոնգրեսի գլխավոր նպատակին՝ «գիտությունն առանց սահմանների»։ Ըստ մասնագետի, այսօր կան բազմաթիվ «սահմաններ», որոնք խոչընդոտում են գիտության ոլորտում միջառարկայական և միջազգային համագործակցությանը։ Նոյեմբերի 8-ից 10-ը Հայաստանում Ռուս-հայկական համալսարանում անցկացվող USERN-ի 8-րդ համաժողովի կարգախոսն է՝ “United Science and Art: The Power For Peace”, թարգմանաբար՝ «Գիտության և արվեստի միասնություն. Ուժ հանուն խաղաղության»,
Ինչպես նշել է համաժողովի կազմկոմիտեի ներկայացուցիչ Ռոքսանա Զաքարյանը, միջոցառման ընթացքում աշխարհի տարբեր երկրներից բազմաթիվ ականավոր գիտնականներ հանդես կգան դասախոսություններով և սեմինարներ կանցկացնեն։ Միջոցառման գիտական ծրագրի հիմնական ուղղություններն են քիմիան, ֆիզիկան, կենսաբանությունը և բժշկությունը։ Կլինեն նաև ելույթներ արվեստի ոլորտից՝ երաժշտական կատարումներ (USERN-ի նախագահն իր դասախոսությունից հետո դաշնամուր է նվագել), արտ-պերֆոմանսներ, թատերական ներկայացումներ, տարբեր խնդիրներ ունեցող երեխաների նկարների ցուցահանդես։
Միջոցառման շրջանակում անցկացվում է մինչև 40 տարեկան գիտնականների պարգևատրում, որոնք ներդրում են ունեցել գիտության զարգացման գործում: Ամենամյա մրցանակաբաշխությունը, որն անցկացվելու է նոյեմբերի 10-ին՝ Գիտությունը հանուն խաղաղության և զարգացման համաշխարհային օրվա առիթով, հիշեցում է գլոբալ առաջընթացի ու ներդաշնակության ապահովման գործում գիտական նորարարությունների փոխակերպող ուժի մասին։ Այս տարի, ինչպես նշել է մասնագետը, մրցանակ կստանա 5 գիտնական, որոնցից միայն երեքն են կարողացել գալ Երևան՝ համաժողովին մասնակցելու։
«USERN-ի համաժողովների և տարբեր վայրերում դրանց անցկացման նպատակը տարբեր կենտրոններից, տարբեր երկրներից գիտնականների ներգրավելն է, նրանց համագործակցության համար հարթակ ստեղծելը, հարթակ, որը վերացնում է սահմանները ազգության, սեռական պատկանելիության, աշխարհագրական սահմանների միջև: Պատահական չէ, որ միջոցառման հիմնական կարգախոսն է «Գիտությունն առանց սահմանների»,- նշել է Ռոքսանա Զաքարյանը։