ԱՀԿ-ն կոչ է անում «հրատապ» պատվաստումների արշավներ կազմակերպել՝ կարմրուկի դեպքերի աճի պատճառով. Politico
23:55 23 հունվարի, 20242023 թվականի առաջին 10 ամիսներին կարմրուկի դեպքերի թիվը նախորդ տարվա համեմատ աճել է 30 անգամ, երեքշաբթի նախազգուշացրել է Առողջապահության համաշխարհային կազմակերպության եվրոպական գրասենյակը՝ կոչ անելով երկրներին իրականացնել «հրատապ» իմունիզացիայի արշավներ, գրում է Politico-ն։
ՄԱԿ-ի առողջապահական մարմինը ասում է, որ բարձր վարակիչ վիրուսի վերածննդի հետևում կանգնած է պատվաստումների անկման մակարդակը։ Վիրուսն առաջացնոմ է ջերմություն, հազ և հազվադեպ դեպքերում թոքաբորբ, ուղեղի բորբոքում և մահ:
ԱՀԿ Եվրոպական տարածաշրջանում 2023 թվականի հունվարից հոկտեմբեր ընկած ժամանակահատվածում գրանցվել է կարմրուկի ավելի քան 30 000 դեպք։ Սա համեմատվում է 941 դեպքի հետ՝ ամբողջ 2022 թվականին։ Վերջին ամիսներին դեպքերն աճել են, և ակնկալվում է, որ միտումը կշարունակվի, եթե հրատապ միջոցներ չձեռնարկվեն, ասել է ԱՀԿ-ն:
«Վիրուսի փոխանցումը դադարեցնելու և դրա հետագա տարածումը կանխելու համար հրատապ անհրաժեշտ է պատվաստում։ Կարևոր է, որ բոլոր երկրները պատրաստ լինեն արագ հայտնաբերել և արձագանքել կարմրուկի բռնկումներին, որոնք կարող են վտանգել կարմրուկի վերացման ուղղությամբ առաջընթացը»,- ասել է ԱՀԿ Եվրոպայի տարածաշրջանային տնօրեն Հանս Կլյուգեն:
ԱՀԿ-ի համաձայն՝ Covid-19 համաճարակը խաթարել է մանկական սովորական իմունիզացիան՝ 2020-ից 2022 թվականներին։ Փորձագետների գնահատմամբ՝ այս ընթացքում ավելի քան 1,8 միլիոն նորածին չի պատվաստվել կարմրուկի դեմ։ ԱՀԿ-ն հայտնել է, որ դեպքերը գրանցվել են այն երկրներում, որտեղ կարմրուկը պաշտոնապես հայտարարվել է վերացված էնդեմիկ հիվանդություն: