Ինչպե՞ս կարելի է լավագույն եւ ամենաճշգրիտ մամոգրաֆիկ պատկերը ստանալ

Երբեւէ մտածե՞լ եք, որ ինքներդ էլ կարող եք, մի քանի պարզագույն միջոցառումների շնորհիվ, որոշիչ դերակատարում ունենալ՝ կրծքագեղձի քաղցկեղի բացահայտմանը միտված մամոգրաֆիկ հետազոտության հնարավորինս ճշգրիտ իրականացման հարցում: Ստորեւ դրանցից չորս ամենակարեւորներն ենք ներկայացնում.

1. Համագործակցեք պատկերումն իրականացնող մասնագետի հետ՝ ճիշտ տեղակայման համար

Մամոգրաֆիկ հետազոտությունը յուրաքանչյուր կրծագեղձի՝ երկու ուղղությամբ պատկերում է ենթադրում: Դրանցից մեկը վերեւից ներքեւ (գլխապոչուկային) ճնշմամբ, իսկ երկրորդն էլ՝ 45 աստիճանի (միջակողմնային) թեքմամբ է իրականացվում:

Հետազոտությունը վարող տեխնիկը յուրաքանչյուր հիվանդի համար լավագույն պատկերումն ապահովելու շարժառիթ ունի: Իսկ կրծքագեղձի քաղցկեղի բացահայտման համար նա պետք է կարողանա ողջ կուրծքը «տեսնել»՝ կրծագեղձի՝ հնարավորինս մեծ ծավալով, հատկապես՝ հետին եզրային հատվածի հյուսվածքներ պատկերի մեջ ներառել, ինչը կարող է ոչ ամենահարմարավետ տեղակայումը պահանջել՝ այցելուի համար:

Այդուհանդերձ, կրծքագեցձի քաղցկեղի առկայությունը վստահորեն բացառելու համար հարկավոր է հնարավորինս համագործակցել հետազոտությունն իրականացնող մասնագետի հետ՝ ճիշտ տեղակայման համար:

2. Կրծքագեղձի ճնշմանը մի դիմակայեք

Մամոգրաֆիան կրծքագեղձի ճնշում է ենթադրում, քանի որ, ի տարբերություն առողջ հյուսվածքների, տարբեր զանգվածներով եւ հատկապես քացկեղով ախտահարվածներն առավել դանդաղ են սպունգի նմանությամբ հարթվելու հատկություն դրսեւորում, ինչը քաղցկեղի առկայությունն ակներեւ է դարձնում՝ հետազոտությունը վարող տեխնիկի համար: Այնպես որ, որքան էլ կրծքագեղձի ճնշումը տհաճ զգացողություններ կարող է առաջացնել, այն միանգամայն անհրաժեշտ է՝ ճշգրիտ արդյունքների ստացման համար: Մանավանդ, որ ընդամենը մի քանի ակնթարթ կարող է տեւել:

3. Փորձեք անշարժ մնալ եւ շունչը պահել՝ պատկերման պահին

Հետազոտության ընթացքում չի կարելի շարժվել, քանի որ տեխնիկն այդ ընթացքում պատկերի բազմակի մեծացմամբ է աշխատում, եւ յուրաքանչյուր տեղաշարժ տեսադաշտի աղճատման կարող է հանգեցնել: Կրծքագեղձում առկա կարծրացումները, որոնք քաղցկեղի առաջացման նախանշան են, միայն հստակ տեսանելիության պարագայում են ախտորոշելի, այնպես որ պատկերման պահին հարկավոր է նույնիսկ շունչը պահել:

4. Նախորդ հետազոտությունների արդյունքներով ներկայացեք

Մամոգրաֆիկ հետազոտություն իրականացնող ռադիոլոգին նաեւ նախընթաց հետազոտությունների արդյունքներն աչքի անցկացնելու, տարեց տարի տեղի ունեցած փոփոխությունները վեր հանելու հնարավորություն պետք է ընձեռել՝ քաղցկեղի հնարավորինս վաղ ախտորոշման համար: Ուստի, եթե նախընթաց հետազոտություններ առկա են, հարկավոր է դրանց արդյունքներով ռադիոլոգին ներկայանալ: