15:07 10 օգոստոսի, 2025
Օրական յոթ հազար քայլը կարող է բավարար լինել դեմենցիայի, քաղցկեղի և մի շարք այլ հիվանդությունների ռիսկը նվազեցնելու համար, ինչպես վկայում է նոր գիտական հետազոտությունը։ Սա շատ ավելի իրատեսական նպատակ է, քան այդքան տարածված օրական 10 հազար քայլը։
Lancet Public Health գիտական ամսագրում հրապարակվել է նոր հետազոտություն՝ 2014–2025 թվականներին գիտական ամսագրերում հրապարակված՝ քայլերի և առողջության միջև կապի վերաբերյալ հոդվածների համակարգված վերանայում և մետավերլուծություն։
Եթե այս թեմայով նախորդ հետազոտությունները կենտրոնացած էին սրտի առողջության և մահացության վրա, ապա նոր հրապարակման հեղինակները փորձել են պատասխանել այն հարցին, թե ինչպես է կատարված քայլերի թիվն ազդում մի շարք հիվանդությունների զարգացման ռիսկի վրա, հայտնում է BBC-ն։
Ընդհանուր առմամբ, հոդվածում վերլուծվում են ավելի քան 160 հազար մարդու առողջության և կատարած քայլերի վերաբերյալ տվյալները։
Հրապարակման հեղինակները եկել են այն եզրակացության, որ օրական 7 հազար քայլը, համեմատած օրական 2 հազար քայլի հետ, նվազեցնում է դեմենցիայի (38%-ով), սիրտ-անոթային հիվանդությունների (25%-ով), դեպրեսիայի (22%-ով), երկրորդ տիպի դիաբետի (14%-ով) և քաղցկեղի (6%-ով) ռիսկը։