Ազնվամորու տերևներից թեյը կանխում է արյան մեջ շաքարի կտրուկ բարձրացումը. Nutrients
17:17 16 սեպտեմբերի, 2025Ազնվամորու տերևներից թեյը կարող է դանդաղեցնել արյան մեջ շաքարի և ինսուլինի մակարդակի բարձրացումը քաղցր բան ուտելուց հետո։ Նման եզրակացության են հանգել Ռեդինգի համալսարանի գիտնականները։ Հետազոտության արդյունքները հրապարակվել են Nutrients բժշկագիտական հանդեսում։
Փորձին մասնակցել են 12 առողջ տղամարդիկ և 10 կանայք։ Կամավորներին խնդրել են օգտագործել գլյուկոզ կամ սախարոզ (սեղանի շաքար)՝ 10 գրամ ազնվամորու տերևներից թեյ կամ առանց դրա։ Հետազոտության մեկնարկից հետո երկու ժամվա ընթացքում պարբերաբար չափվել է բոլոր կամավորների արյան մեջ շաքարի և ինսուլինի մակարդակը։
Վերլուծությունը ցույց է տվել, որ երբ սախարոզը համակցվել է ազնվամորու տերևներից թեյի հետ, արյան մեջ շաքարի մակարդակի բարձրացումը զգալիորեն դանդաղել է։ Քաղցր բան ուտելուց 15 րոպե անց մակարդակը միջինում 25%-ով ցածր էր, իսկ կես ժամ անց՝ գրեթե 44%-ով՝ վերահսկիչ խմբի համեմատ։ Ինսուլինի կոնցենտրացիաները ևս ցածր էին 15, 30 և 60 րոպե հետո։ Սակայն գլյուկոզ օգտագործելիս էական համահարաբերակցություն չի նկատվել։
Գիտնականները դրական ազդեցությունը վերագրում են բնական քիմիական միացությունների՝ թեյի մեջ պոլիֆենոլների առկայությանը: Առավել ցայտուն ազդեցությունը կարող էր ունենալ էլլագաթթուն, որը ճնշում է որոշ մարսողական ֆերմենտների աշխատանքը: Գիտնականների համոզմամբ՝ թեյի բաղադրիչները հիմնականում ազդում են ավելի բարդ շաքարների, մասնավորապես՝ սախարոզի վրա։
Հետազոտության հեղինակներն ընդգծում են, որ իրենց աշխատանքը ազնվամորու տերևների թեյի՝ վաղ հետճաշային շաքարի և ինսուլինի մակարդակը նվազեցնելու ունակության առաջին կլինիկական հաստատումն էր: Հաջորդ քայլը կլինի նախադիաբետից և 2-րդ տիպի շաքարախտից տառապող մարդկանց շրջանում ուսումնասիրությունները: Մասնագետների կարծիքով՝ նման թեյը կարող է նյութափոխանակության առողջությունը պահպանելու պարզ միջոց դառնալ: