Հունական յոգուրտը մարզվելուց հետո ավելի լավ է նվազեցնում բորբոքումը, քան ածխաջրերը․ Nutrients
00:31 26 սեպտեմբերի, 2025Գիտնականները պարզել են, որ մարզումից հետո հունական յոգուրտ կերած երիտասարդ տղամարդկանց մոտ բորբոքման մակարդակն ավելի ցածր է եղել, քան նրանց մոտ, ովքեր ածխաջրային պուդինգ են կերել։
«Nutrients» ամսագրում հրապարակված հետազոտությանը մասնակցել են 30 առողջ երիտասարդ տղամարդիկ, ովքեր 12 շաբաթվա ընթացքում կատարել են ուժային և պլիոմետրիկ վարժություններ։
Խումբը, որը մարզումից հետո հունական յոգուրտ էր օգտագործում (GY) և վերահսկիչ խումբը, որը ստանում էր իզոէներգետիկ ածխաջրային պուդինգ (CP), համադրելի էին ըստ կալորիականության։
Փորձարկման արդյունքում պարզվել է, որ GY խմբում պրոբորբոքային ինտերլեյկին-6-ի (IL-6) մակարդակը 12-րդ շաբաթվա դրությամբ ավելի ցածր էր, քան CP խմբում։
Բացի այդ, CP խմբում նկատվել է TNF-α մակարդակի և TNF-α/IL-10 հարաբերակցության աճ, ինչը չի նկատվել GY խմբում:
Հեղինակները շեշտում են, որ թեև սնուցման երկու տեսակներն էլ ուղեկցվում էին կանոնավոր վարժությունների օգուտներով (օրինակ՝ IL-1β-ի և C-ռեակտիվ սպիտակուցի նվազեցում), հունական յոգուրտի ազդեցությունը կայանում էր նրա՝ սուր բորբոքային պատասխանը մեղմելու և ավելի հավասարակշռված իմունային կարգավիճակ պահպանելու ունակության մեջ։
Այնուամենայնիվ, հետազոտությունը սահմանափակումներ ունի. այն երկրորդական վերլուծություն էր, իսկ սկզբնական մասնակիցները երիտասարդ, ենթակազմ տղամարդիկ էին՝ առանց բարձր բազալ բորբոքման, հետևաբար արդյունքները չեն կարող ապացույց համարվել բնակչության բոլոր խմբերի համար։
Հեղինակները կարծում են, որ հունական յոգուրտը, որպես կենսաբանորեն ակտիվ միացություններ պարունակող խմորված կաթնամթերք, կարող է օգտակար տարր լինել մարզումից հետո սննդակարգում՝ բորբոքումը նվազեցնելու և ավելի լավ վերականգնման համար։