Խիստ դիետաները կասկածի տակ են. գիտնականները զգուշացնում են «առողջ» սնվելու ռիսկերի մասին

Սննդակարգի խիստ վերահսկողությունը ոչ միայն չի երաշխավորում առողջությունը, այլև կարող է վնասել դրան։ Այս մասին հայտնում է The Conversation-ը՝ հղում անելով նոր հետազոտություններին։

Գիտնականները պարզել են, որ «ճիշտ» սնվելու մոլուցքը կարող է հանգեցնել օրթորեքսիա կոչվող խանգարմանը, որի դեպքում բացառապես «առողջ» ուտելու ձգտումը բացասաբար է անդրադառնում կյանքի որակի և սոցիալական կապերի վրա։ Սնվելու ժամանակակից մշակույթը մեծամասամբ ձևավորվել է գիրության շուրջ տագնապի ֆոնին, որն ուժեղացել է 1980-ականներին, սակայն ավելորդ քաշի պատճառները շատ ավելի բարդ են, քան պարզապես սննդակարգը, իսկ սահմանափակումների միջոցով խնդիրը լուծելու փորձերը չեն տվել սպասված արդյունքները։

Որպես այլընտրանք հետազոտողները նշում են ինտուիտիվ սնուցումը՝ սեփական օրգանիզմի ազդակներով կողմնորոշումը, ինչպիսիք են քաղցի զգացումը, հագեցվածությունը և որոշակի սննդանյութերի կարիքը։ Այս մոտեցումը կիրառող մարդիկ հիմնականում ունենում են ավելի որակյալ սննդակարգ, ավելի լավ հոգեկան վիճակ և մարմնի զանգվածի ավելի ցածր ինդեքս։ Դրական ազդեցություն են թողնում նաև կանոնավոր սնվելը և համատեղ ճաշկերույթները։

Մասնագետները շեշտում են, որ առողջ սնունդը ոչ թե արգելքներն են, այլ ճկուն հավասարակշռությունը, որը հաշվի է առնում ուտելիքից ստացած հաճույքը, սոցիալական համատեքստը և ընդհանուր ինքնազգացողությունը։ Վերահսկողությունից դեպի գիտակցվածություն անցումը, նրանց կարծիքով, օգնում է ձևավորել կայուն սովորություններ՝ առանց սթրեսի և մեղքի զգացման։