Նոր հետազոտությունները հաստատում են, որ սուրճի և թեյի չափավոր օգտագործումը կարող է օգտակար լինել առողջության համար

Ժամանակակից գիտական տվյալները փաստում են, որ կոֆեինի չափավոր օգտագործումը, հատկապես սուրճի և թեյի տեսքով, կարող է օգտակար լինել մեծահասակների մեծ մասի համար։ Այդուհանդերձ, մասնագետները ընդգծում են, որ այս եզրահանգումները չեն վերաբերում էներգետիկ ըմպելիքներին և սինթետիկ կոֆեին պարունակող ապրանքներին։

Միջինում չափահաս մարդիկ օրական սպառում են մոտ 200 մգ կոֆեին, ինչը հավասարազոր է մոտ երեք բաժակ էսպրեսոյի։ Խոշոր դիտարկողական հետազոտությունների և փոքր կլինիկական փորձարկումների համաձայն՝ օրական մինչև 400 մգ կոֆեինը (մոտ 3–5 բաժակ սուրճ) անվտանգ է համարվում առողջ մեծահասակների մեծ մասի համար։

Ուսումնասիրությունները ցույց են տալիս, որ սուրճի և թեյի օգտագործումը նվազեցնում է սիրտ-անոթային հիվանդությունների, ինսուլտի, իմպուլսի, սրտի անբավարարության, 2-րդ տիպի շաքարային դիաբետի, զարկերակային հիպերտենզիայի և նախասրտերի ֆիբրիլյացիայի ռիսկը։ Բացի այդ, համաճարակաբանական խոշոր հետազոտությունները վկայում են, որ սուրճի և թեյի սիրահարների շրջանում Պարկինսոնի հիվանդությունն ավելի հազվադեպ է հանդիպում։

Առողջության վրա հնարավոր երկարաժամկետ ազդեցությունից զատ, կոֆեինը հայտնի է էներգիան, ուշադրության կենտրոնացումը, արձագանքման արագությունը և աշխատունակությունը բարձրացնելու իր հատկությամբ․ դա է պատճառը, որ այն մնում է ամենատարածված բնական խթանիչներից մեկը։

Միևնույն ժամանակ, փորձագետները հիշեցնում են, որ կոֆեինը չի կարելի համարել առողջության պահպանման ունիվերսալ միջոց։ Դրա չարաշահումը կարող է առաջացնել տագնապայնություն, նյարդայնություն, անքնություն, սրտխառնոց, ստամոքսի անհանգստություն և դող՝ հատկապես զգայուն մարդկանց մոտ։

Կարևոր է նշել, որ դրական ազդեցություն արձանագրած հետազոտությունների մեծ մասը վերաբերել է բացառապես կոֆեինի բնական աղբյուրներին՝ սուրճին, թեյին և շոկոլադին։ Այսօր չկան համոզիչ ապացույցներ այն մասին, որ էներգետիկ ըմպելիքները կամ սինթետիկ կոֆեինով հավելումներն ունեն նույն առավելությունները։

Ավելին, առկա տվյալները ցույց են տալիս, որ էներգետիկ ըմպելիքները կարող են կապված լինել սրտի ռիթմի վտանգավոր խանգարումների և սրտային անբավարարության բարձր ռիսկի հետ, թեև այս ոլորտում հետազոտությունները դեռևս անբավարար են։

Մասնագետները եզրակացնում են, որ սուրճի և թեյի չափավոր օգտագործումը կարող է առողջ ապրելակերպի մաս լինել, մինչդեռ էներգետիկ ըմպելիքները չպետք է դիտարկվեն որպես կոֆեինի անվտանգ կամ օգտակար աղբյուր։