Գիտնականները պարզել են, թե ինչպես նիհարել առանց կալորիաները հաշվելու. կարևորը սննդի բաղադրությունն է

Գիտնականները պարզել են, որ ցածր յուղայնությամբ վեգանական սննդակարգն օգնում է մարդկանց նիհարել՝ առանց կալորիաները հաշվելու կամ սննդի ընդունումը սահմանափակելու։ Դա պայմանավորված է նրանով, որ բուսական սնունդը պարունակում է ավելի քիչ կալորիա մեկ գրամի համար, ինչը թույլ է տալիս մարդուն հագենալ ավելի քիչ էներգիայով։

Հետազոտության արդյունքները հրապարակվել են JAMA Network Open-ում։

Կլինիկական փորձարկմանը մասնակցել են ավելորդ քաշ ունեցող մեծահասակներ։ 16 շաբաթվա ընթացքում մի խումբը հետևել է մրգերից, բանջարեղենից, հացահատիկներից և լոբազգիներից բաղկացած սննդակարգի, առանց մսի, կաթնամթերքի և ձվի։ Վերահսկիչ խումբը չի փոխել իր սննդակարգը։ Երկու խմբերի մասնակիցներն էլ չեն ենթարկվել կալորիական սահմանափակումների։

Բուսական սննդակարգին հետևող մարդկանց մոտ էներգիայի խտությունը՝ սննդի մեկ գրամի կալորիաների քանակը, նվազել է մոտ 30 տոկոսով։ Միևնույն ժամանակ, սպառված սննդի ընդհանուր քաշը մնացել է գործնականում անփոփոխ. մասնակիցները շարունակել են ուտել մոտավորապես նույն քանակությամբ սնունդ, բայց սպառել են ավելի քիչ կալորիա։ Միջին հաշվով վեգան խմբի մարդիկ կրճատել են իրենց էներգիայի ընդունումը օրական մոտ 357 կիլոկալորիայով, ինչն ուղեկցվել է ավելի մեծ քաշի կորստով՝ վերահսկիչ խմբի համեմատ։

Հետազոտության հեղինակների կարծիքով՝ հիմնական գործոնը բուսական սննդամթերքում ջրի և մանրաթելի մեծ պարունակությունն է: Բանջարեղենը, մրգերը, լոբազգիները և ամբողջահատիկները շատ տեղ են զբաղեցնում ափսեում, օգնում են պահպանել կուշտ լինելու զգացումը, բայց պարունակում են ավելի քիչ կալորիա, քան էներգետիկ առումով խիտ սննդամթերքները, ինչպիսին են միսը, պանիրը և ձուն:

Հետազոտողները նշել են, որ այս մոտեցումը տարբերվում է չափաբաժինների կրճատման և կալորիաների հաշվարկի վրա հիմնված ավանդական առաջարկներից: Սննդի քանակը սահմանափակելու փոխարեն այն խորհուրդ է տալիս փոխել դրա կազմը:

«Խոսքը կամքի ուժի և փոքր չափաբաժինների մասին չէ, այլ այն սննդամթերքների ընտրության, որոնք, բնականաբար, պարունակում են ավելի քիչ կալորիա մեկ գրամի համար», - նշել է հետազոտության առաջատար հեղինակ Հանա Կալեխովան:

Գիտնականները կարծում են, որ սննդակարգի էներգետիկ խտության նվազեցումը կարող է լինել ավելի կայուն քաշի կառավարման ռազմավարություն, քանի որ թույլ է տալիս մարդկանց ուտել մինչև կուշտ լինելու զգացողություն ունենալը՝ միաժամանակ նվազեցնելով կալորիաների ընդհանուր ընդունումը: