Ելակի տերևների քաղվածքը կարող է պաշտպանել նյարդային բջիջները Պարկինսոնի հիվանդությանը բնորոշ վնասվածքներից․ Frontiers

Ելակի տերևների քաղվածքը կարող է պաշտպանել նյարդային բջիջները Պարկինսոնի հիվանդությանը բնորոշ վնասվածքներից։ Օսակայի քաղաքային համալսարանի ճապոնացի գիտնականները պարզել են, որ այն նվազեցնում է օքսիդատիվ սթրեսը, աջակցում է միտոքոնդրիումների աշխատանքին և կրճատում նեյրոնների մահը բջիջների ու մկների վրա անցկացված փորձարկումներում։ Ուսումնասիրությունը հրապարակվել է «Frontiers in Nutrition» ամսագրում։

Սկզբում հետազոտողները նյարդային բջիջների վրա ազդել են ռոտենոնով՝ թունավոր նյութով, որն առաջացնում է օքսիդատիվ սթրես և խաթարում միտոքոնդրիումների աշխատանքը։ Այս կառույցները բջիջներին ապահովում են էներգիայով, իսկ դրանց վնասումը համարվում է նեյրոդեգեներատիվ հիվանդությունների զարգացման հետ կապված գործոններից մեկը։

Ելակի տերևների քաղվածքը բարձրացրել է բջիջների ապրելիությունը, նվազեցրել թթվածնի ակտիվ ձևերի առաջացումը և օգնել վերականգնել միտոքոնդրիումների աշխատանքը։ Այնուհետև գիտնականները դրա ազդեցությունը ստուգել են Պարկինսոնի հիվանդության մոդելավորում ունեցող մկների վրա։

Քաղվածք ստացած կենդանիների մոտ ավելի քիչ թվով դոֆամինային նեյրոններ են մահացել․ սրանք ուղեղի այն բջիջներն են, որոնց կորուստը կապված է հիվանդության հիմնական շարժողական ախտանիշների հետ։ Մկների մոտ նաև նվազել են շարժողական խանգարումների դրսևորումները։

Հետազոտողները այս ազդեցությունը կապում են պոլիֆենոլների հետ․ դրանք բուսական միացություններ են, որոնք ունակ են ակտիվացնել բջիջների բնական պաշտպանական մեխանիզմները օքսիդատիվ վնասումից։ Հեղինակների կարծիքով՝ ելակի տերևների նյութերը ապագայում կարող են հիմք դառնալ նեյրոդեգեներատիվ հիվանդությունների դեմ նոր միջոցների մշակման համար։

Ինչպես նշում են գիտնականները, արդյունքները ստացվել են բջջային կուլտուրաների և կենդանիների վրա անցկացված փորձարկումներից, փոխարենը դեռևս հայտնի չէ՝ արդյոք քաղվածքը նույն կերպ կգործի Պարկինսոնի հիվանդությամբ պացիենտների մոտ։ Մարդկանց համար համապատասխան չափաբաժիններն ու դեղաչափերը ճշգրտելու համար անհրաժեշտ են հետագա հետազոտություններ, այդ թվում՝ կլինիկական փորձարկումներ։