Մշակվել է նոր սերնդի ձողախողովակ, որը հնարավորություն է տալիս ուսումնասիրել վտանգավոր վահանիկները պսակաձև զարկերակների ներսից

Դեյվիսի Կալիֆոռնիայի համալսարանի հետազոտողներն ավարտել են պսակաձև զարկերակներում աթերոսկլերոտիկ վահանիկների կառուցվածքն ու քիմիական կազմը իրական ժամանակում ուսումնասիրելու հնարավորություն տվող սարքի առաջին փորձարկումները մարդկանց վրա, ասվում է համալսարանի հաղորդագրության մեջ:

Նոր տեխնոլոգիան կարող է օգնել բժիշկներին ավելի ճշգրիտ գնահատել վահանիկների պատռման ռիսկը և ընտրել բուժման մարտավարությունը:

Ճկուն կաթետերը մշակել են Ինտերվենցիոն բիոֆոտոնիկ տեխնոլոգիաների ազգային կենտրոնի (NCIBT) մասնագետները: Այն համատեղում է պատկերման երկու մեթոդ՝ ֆլուորեսցենտային կյանքի տևողության պատկերում (FLIm) և օպտիկական կոհերենտ տոմոգրաֆիա՝ բևեռացման վերլուծությամբ (PS-OCT): Առաջին մեթոդը թույլ է տալիս գնահատել հյուսվածքների բիոքիմիական կազմը դրանց բնական ֆլուորեսցենցիայով, իսկ երկրորդը՝ ուսումնասիրել դրանց միկրոկառուցվածքը:

Միջամտության ընթացքում կաթետերը՝ ձողախողովակը, մտցվում է պսակաձև զարկերակների մեջ, որտեղ այն պտտվում է և աստիճանաբար դուրս քաշվում՝ միաժամանակ ստանալով պատկերներ: Երկու վայրկյանում սարքն ունակ է սկանավորել զարկերակի 80 մմ երկարությամբ հատվածը: Այն թույլ է տալիս հայտնաբերել վահանիկների կուտակումները նույնիսկ մինչև արտահայտված ստենոզի՝ անոթի ախտաբանական նեղացման զարգացումը, որը կարող է խախտել արյան բնականոն հոսքը:

Ներանոթային պատկերման գոյություն ունեցող մեթոդները, ներառյալ օպտիկական կոհերենտ տոմոգրաֆիան և ուլտրաձայնային հետազոտությունը, օգնում են գնահատել անոթների կառուցվածքը, բայց նույնպիսի տեղեկություններ չեն տալիս դրանց բիոքիմիական կազմի մասին: Մինչդեռ վահանիկների առանձնահատկությունները կարող են նշել բորբոքման և դրանց պատռման բարձր ռիսկի մասին: Դա կարևոր է, քանի որ վահանիկի պոկված հատվածները և ձևավորված թրոմբները կարող են հանգեցնել ինֆարկտի կամ այլ ծանր բարդությունների:

«Այս տեխնոլոգիան կարող է օգնել բժիշկներին ավելի լավ հասկանալ աթերոսկլերոտիկ սիրտ-անոթային հիվանդության զարգացումը և ընտրել բուժումը՝ հաշվի առնելով բուժառուի անհատական առանձնահատկությունները»,- հայտարարել է NCIBT-ի հիմնադիր Լորա Մարկուն:

Ավելի վաղ սարքը փորձարկվել էր կենդանիների և մարդկային պսակաձև զարկերակների նմուշների վրա: Այս տարի ԱՄՆ Սննդամթերքի և դեղերի որակի վերահսկողության վարչությունը (FDA) թույլատրել է անցկացնել հետազոտություն 10 բուժառուի մասնակցությամբ: Օգոստոսին թիմն ավարտել է պատկերումը վերջին մասնակցի մոտ:

Հաջորդ փուլը կլինի հետազոտության ընդլայնումը: Հեռանկարում մշակողները նախատեսում են կաթետերը կիրառել կարդիոլոգիական լաբորատորիաներում՝ վահանիկների բնութագրերն ավելի ճշգրիտ որոշելու և ստենտների՝ նեղացած զարկերակների լուսանցքը պահպանող հատուկ կառուցվածքների տեղադրման վայրերն ընտրելու համար: