Թաքցված քաղցրավենիքն էլ ավելի բաղձալի է դառնում. ինչպես են ծնողների արգելքներն ազդում երեխաների սննդային սովորությունների վրա
12:34 4 նոյեմբերի, 2026Քաղցրավենիքի խիստ արգելքը կարող է հանգեցնել նրան, որ երեխաներն սկսեն մեծ քանակությամբ կոնֆետ և այլ քաղցրավենիք ուտել, երբ դրանք հասանելի են դառնում։ Հետազոտությունները ցույց են տալիս, որ մշտական սահմանափակումները մեծացնում են երեխայի հետաքրքրությունն արգելված մթերքների նկատմամբ և խանգարում նրան սովորելու ինքնուրույն ճանաչել քաղցի ու հագեցածության զգացումը, գրում է The Conversation պարբերականը։
Երբ ծնողները որոշ մթերքներ անվանում են «լավ», իսկ մյուսները՝ «վատ», երեխաների մոտ կարող է այս կամ այն սննդի հանդեպ մեղքի կամ ամոթի զգացում ձևավորվել։ Իսկ եթե քաղցրավենիքն անընդհատ թաքցնում են և թույլատրում միայն հատուկ առիթներով, երեխան կարող է այն ընկալել որպես առանձնահատուկ բաղձալի մի բան և փորձել հնարավորինս շատ ուտել առաջին իսկ հնարավորության դեպքում։
Մասնագետները խորհուրդ են տալիս սնունդը չբաժանել արգելվածի և թույլատրվածի, ինչպես նաև քաղցրավենիքը չվերածել լավ վարքի դիմաց տրվող պարգևի։
Փոխարենը հարկավոր է երեխաներին բացատրել, որ տարբեր մթերքներ տարբեր կերպ են ազդում օրգանիզմի վրա, և օգնել նրանց առաջնորդվելու քաղցի ու հագեցածության սեփական զգացողություններով։
Էլլին Սաթերի ինստիտուտի մշակած մոտեցումներից մեկը ենթադրում է պատասխանատվության բաշխում. ծնողները որոշում են, թե երբ և ինչ սնունդ առաջարկել, իսկ երեխան ինքնուրույն է ընտրում, թե առաջարկվածից ինչ և որքան ուտի։
Սննդաբանները նաև խորհուրդ են տալիս երեխաներին ներգրավել ճաշացանկի կազմման ու գնումների գործընթացում, չմեկնաբանել և չգնահատել նրանց սննդային ընտրությունը։
Ըստ նյութի հեղինակի՝ ողջամիտ սահմաններում քաղցրավենիքի ազատ և հանգիստ հասանելիությունը ժամանակի ընթացքում օգնում է նվազեցնել դրա գրավչությունն ու սննդի հետ ավելի առողջ հարաբերություններ ձևավորել։