Ռուսական ձեռնարկությունը Հայաստան առաջին իզոտոպային գեներատորն է առաքել
20:28 30 հունվարի, 2015«Ռոսատոմ» պետկորպորացիայի ձեռնարկություն ««Իզոտոպ»համատարածաշրջանային միավորումը» 2015 թ. հունվարին Հայաստան տեխնեցիում-99m-ի՝ օնկոլոգիական եւ սրտանոթային հիվանդությունների ախտորոշման համար կիրառվող ռադիոակտիվ իզոտոպի առաջին գեներատորն է առաքել: Այս մասին հայտարարել է ձեռնարկության մամլո ծառայությունը:
Տեխնեցիում-99 m-ն կարճ կյանք ունեցող իզոտոպ է, որի օգնությամբ աշխարհում տարեկան մինչեւ 30 միլիոն ախտորոշիչ պրոցեդուրաներ են իրականացվում:
Հայաստանում տեղադրված սարքը մշակել է Կարպովի անվան գիտահետազոտական ֆիզիկա-քիմիական ինստիտուտը:
«Իզոտոպի» եւ ՀՀ առողջապահության նախարարության Ռադիացիոն բժշկության եւ այրվածքների գիտական կենտրոնի միջեւ ինտեգրման պայմանագրի շրջանակում 2015 թ. պլանավորվում է կենտրոնին յուրաքանչյուր ամիս տրամադրել տեխնեցիում-99m գեներատորներ եւկից աշխատող ախտորոշիչ սարքեր:
««Իզոտոպ ՀՄ» ԲԲԸ-ի հետագա պլանների մեջ է մտնում մեծացնել մատակարարման ծավալները, նաեւ ընդլայնել համագործակցության շրջանակը միջուկային բժշկության ոլորտում մասնագիտացված հայկական կլինիկաների հետ»-ասված է հաղորդագրության մեջ:
«Իզոտոպ ՀՄ» ԲԲԸ-ն շուկայում հայտնի է իզոտոպային արտադրությամբ, ճառագայթային տեխնիկայով, բժշկական եւ ընդհանուր նշանակության սարքավորումներով: