Ճի՞շտ է արդյոք քունն առնել միայն հանգստյան օրերին

Շատերը շաբաթվա ընթացքում քնում են ավելի քիչ, քան պետք է՝ փորձելով քունն առնել միայն հանգստյան օրերին: Ճի՞շտ է արդյոք վարվել այդպես եւ կարող է արդյոք սա խնդիրների պատճառ դառնալ: Պարզաբանում է Քնի խանգարման հայկական ասոցիացիայի նախագահ, նյարդաբան Սամսոն Խաչատրյանը։

Մասնագետի խոսքով՝ քնի պակասը շաբաթվա ընթացքում լուրջ խնդիր է առաջացնում օրգանիզմի համար, եւ այն չի կարող կոմպենսացվել միայն հանգստյան օրերին, նույնիսկ եթե այդ օրերին քնել երկու անգամ ավել: Այդ պատճառով շատ կարեւոր է պահպանել քնի նորմալ ռեժիմը՝ անկախ օրվանից եւ ամեն օր քնել 6-8 ժամ (http://med.news.am/arm/news/5396/orakan-qani-zham-e-petq-qnel.html):

Ի՞նչ կլինի, եթե մարդը բավականաչափ քնի միայն հանգստյան օրերին

Սամսոն Խաչատրյանի խոսքով՝ քնի պակասը (6 ժամից պակաս քնելը) 5 աշխատանքային օրվա ընթացքում մարդուն ավելի նյարդային կդարձնի: Նրա համար դժվար կլինի կենտրոնանալ աշխատանքի, ուսման, եւ, առհասարակ, որեւէ բանի վրա, ինչը, ամենայն հավանականությամբ, կանդրադառնա գործընկերների եւ դասախոսների հետ նրա հարաբերությունների վրա: Բացի այդ՝ առողջությունը եւս կտուժի.

• Լիարժեք հանգստի բացակայության պայմաններում քրոնիկ սիրտ-անոթային հիվանդությունները կարող են սրվել, կարող են ի հայտ գալ նոր հիվանդություններ, որոնք նախկինում չեն եղել, բացի այդ՝ քնի պակասի դեպքում բարձրանում է զարկերակային հիպերտենզիայի եւ շաքարային դիաբետի առաջացման հավանականությունը

• Քնի պակասի դեպքում կարող է զարգանալ նաեւ դեպրեսիան, նեվրոտիկ խանգարումները, որոնք նկատելիորեն կվատթարացնեն կյանքի որակը:

• Քնի պակասը վնասակար է նաեւ կազմվածքի համար: Համարվում է, որ առողջ քունը օգնում է նորմալ քաշ պահպանել, իսկ քնի պակասը նպաստում է նյութափոխանակման պրոցեսների ակտիվության անկմանը եւ ավելորդ քաշի ի հայտ գալուն:

Եթե դուք չեք կարողանում բավականաչափ քնել շաբաթվա ընթացքում, փորձեք հետեւել այս խորհուրդներին: