Ապրիլի 16-ին Հարվարդի համալսարանի մասնագետները հեմանգիոմաներ են հեռացնելու Երեւանում
15:49 6 ապրիլի, 2015Ապրիլի 16-ին Երեւան է ժամանելու Հարվարդի համալսարանի մասնագետների մի խումբ: Հայ-ամերիկյան բժշկական կենտրոնում նրանք անվճար կհեռացնեն հեմանգիոմաները հիվանդների մաշկից հատուկ լազերային սարքավորումների միջոցով: Այս մասին լրագրողներին պատմեց կենտրոնի տնօրեն Խաչանուշ Հակոբյանը:
Նրա խոսքով՝ բժիշկներն աշխատելու են ամբողջ օրվա ընթացքում եւ մոտավորապես 15 հոգի կկարողանա օգտվել առաջարկից եւ անվճար հեռացնել մաշկի այդ գոյացությունները: Այդ նպատակով պետք է զանգահարել կենտրոն եւ պայմանավորվել այցելության մասին, նշեց Խաչանուշ Հակոբյանը:
Հեմանգիոմաները մաշկային բնածին գոյացություններ են, որոնք բաղկացած են ինվոլյուցիայի ենթարկված էնդոտելիումային բջիջներից: Սովորաբար այդ գոյացությունները ի հայտ են գալիս կյանքի առաջին տարիներին կամ շաբաթներին եւ մեծանում 5-6 ամսիների ընթացքում: 12 ամիս անց գոյացության աճը դադարում է, եւ սկսվում է ինվոլյուցիան: Հեմանգիոմաների մեծ մասը վերանում է հիվանդի 12 տարին լրանալուց:
Սովորաբար նույնիսկ պահպանված հեմանգիոմաները ոչ մի անհանգստություն չեն պատճառում, սակայն տարիքի հետ դրանք երբեմն սկսում են խանգարել կամ պարզապես տգեղ տեսք ունենալ: Մեծ հեմանգիոմաներում կարող է տրոմբագոյացում տեղի ունենալ, որը սպառում է տրոմբոցիտների պաշարները եւ նվազեցնում արյան մակարդելիությունը:
Անհրաժեշտության դեպքում հեմանգիոմաները բուժում են պրոպրանոլոլի միջոցով կամ հեռացնում լազերի, ազոտի, միկրոալիքների կամ հերձադանակի օգնությամբ: